Shillong, Nailur 13 : U MLA barim ka Mawsynram bad Nongaiktien ka BJP Bah Himalaya M Shangpliang, hynne ka sngi Balang, ula leit ban pyniasoh noh ialade bad ka National People’s Party (NPP).
Ia une u MLA barim la pdiang sngewbha da u Myntri Rangbah ka Jylla bad National President ka NPP Conrad K Sangma, u DyCM bad National Vice President Bah Prestone Tynsong, DyCM Bah Sniawbhalang Dhar bad kiwei kiwei ki nongialam ka Party, ha ka jingialang bala pynlong ha ophis ka NPP ha Shillong.
U Myntri Rangbah barim ka Jylla uba bat mynta ia ka kam Adviser ka Sorkar MDA Dr D.D Lapang ruh ula iadonlang ban pdiang burom ia ka jingwan iasoh u Bah Himalaya.
Haba pyntip ia kane lyngba ka X, u Myntri Rangbah ka Jylla ula ong “Ka NPP ka pdiang sngewbha ia u MLA barim ka Mawsynram Bah Himalaya M Shangpliang sha ka Iing ka sem jong ka NPP. U Bah Hima u dei u Nongialam ba trei shitrhem bha, uba jur kren ia ki jingeh ki paidbah ka Jylla bad un dei ruh u nongwan bynrap ban pynkhlain ia ka NPP ha ka ban pyntyllun shakhmat ia ka Mission & Vision jong ngi na ka bynta ka Meghalaya”.
NPP welcomes Former MLA from Mawsynram, Shri Himalaya M Shangpliang to the NPP family. Shri Hima has been an active leader, voicing concerns of the people of the State and will be a great addition to the NPP in furthering our mission & vision for Meghalaya. pic.twitter.com/541FXKsL6b
— Conrad K Sangma (@SangmaConrad) September 13, 2023
Hadien ba dep iasoh bad ka party, u Bah Himalaya haba ai jingkren, ula kdew ba dei ki kam pynroi bad ki sienjam bala shim ha kaban kyntiew ia ki samla bad ki nongrep ka Jylla da ka Sorkar MDA ba ialam da ka NPP, kaba la ai mynsiem ia u ban rung sha ka Party.
Ula ong ruh ba ma u ha ryngkat bad 3000 ngut ki Nongkyrshan na Mawsynram kila iasoh bad ka NPP, ka sienjam bala pdiang sngewbha ruh da u MDC ka Mawsynram bad Block President Bah Alvin Sawkmie.
