Shillong Nohprah 17: Kumba 2000 ngut ki paidbah kynthup iaki nongialam bad ki nongkitkam shnong, ki nonghikai, ki samla nongialam bad ki nongkyrshan ka NPP, hynne ka sngi saitjaiñ, kila pyniasoh ialade bad ka seng BJP ha ka jingialang kaba la long ha Resubelapara.
Kitei kiba la pyniasoh ki kynthup ruh ia u Organising Secretary barim ka VPP u Rocky Marak, ki Nokma, ki Sordar Shnong bad kiwei kiwei ha ka jingsakhi lang jongu BJP Media Convenor ka Assam u Rupam Goswami, u National Council Member u Rikman Momin, u MLA barim ka NPP u Benedic R. Marak, u MDC bad Vice President ka BJP Meghalaya u Bernard Marak, u CEM barim ka GHADC u Dipul Marak, u Dharmonath Sangma bad ki District President jong ka BJP.
U Goswami ula pdiang sngewbha ia kitei ki paidbah kiba la wan pyniasoh bad ka BJP bad ula pynthikna iaki, ba ka BJP kan sdang ban treikam noh na ka bynta ban kyntiew iaka roi ka par jong ki paidbah hadien bala thaw iaka sorkar ynda la dep ka elekshon MLA ban wan.
Ula ai khublei ia ki paidbah kiba la jied iaka roi ka par bad ula kular ia ki paidbah ba shen ka rilum Garo kan sa ioh mad ia ki kam pynroi kiba bun, kumba mad kiwei pat ki jylla kiba synshar da ka sorkar BJP.
U Rikman ruh ula kular ia ki paidbah ba ia ka jingiohi jngai jong u Myntri Rangbahduh ka ri u Narendra Modi na ka bynta ka Meghalaya yn sa pyntreikam noh bad yn sa pyntreikam pura hadien ba la dep ka elekshon haka jylla.
Katba u Bernard ula pynthikna iaki paidbah baka sorkar kaban ialam da ka BJP kan rat dyngkhong ia ki kam bamsap ha ka jylla bad ula pynthikna ba ka pisa kaba mang sha u paidbah kadei ban poi beit sha u paidbah lada kadei tang shi tyngka ruh.
