Shillong, Jylliew 03 : Kum ka sienjam ba kongsan sha ka jingroi bad jingkiew shaphrang jong ka Ri bad ka bor treikam jong ka thain Shatei Lam Mihngi, ka Indian Institute of Corporate Affairs (IICA), jong ka Ministry of Corporate Affairs, kala thied ia ka jaka ba 5 acre ha New Shillong Township, Meghalaya ba kan seng ia ka Regional Campus ba nyngkong eh.
Kane ka sienjam ka pyni ia ka jingpyniar ia ka jylli treikam jong ka IICA ha ka thain Shatei Lam Mihngi, kaba pynskhem ia ka jingkular jong ka ban kyntiew ia ka kam seng Kompani bad ka roi ka par kaba neh.
Ia kane ka jingia aiti ia ka jaka la pyniaid da u Chief Secretary ka Jylla Bah DP Wahlang bad ka Deepto Gaur Mukerjee, Secretary ka Ministry of Corporate Affairs. Kiba iadonlang ki kynthup ia u Gyaneshwar Kumar Singh, Director General bad CEO ka IICA; Inderdeep Singh Dhariwal, Joint Secretary ka Ministry of Corporate Affairs bad Bah C.V.D. Diengdoh, Commissioner & Secretary ka Tnad Planning Department.
Ka jingshimti bad jingaiti ia ka jaka la leh da u Bah K Hynniewta, Joint Secretary ka Tnad Planning uba mihkhmat ia ka Sorkar Meghalaya lem bad u Shekhar Srivastava, Deputy Secretary ka Sorkar India.
Haba ïaroh ïa ka jingthmu, u Chief Secretary u la pynpaw ïa ka jingangnud jong ka Meghalaya ba kan kiew shaphrang da ka jingstad bad u la pynpaw ba ka IICA Campus kan don hapdeng eh jong ka Knowledge City. Kane ka jaka kala don lypa ia ki jingtei ba paw kum ka IIM Shillong, ka Nationa Law University Meghalaya bad NIFT.
U Chief Secretary ula pyntip ruh ba shen yn sa shna ia ka kad liengsuin ba thymmai ha Shillong, ka ban pynkhlain shuh shuh ia ka lad pyniasoh jong ka thain bad ka ban pynlong ia ka IICA Campus kaba suk ban poi iaki riewshemphang, ki nonghikai bad ki samla pule na kylleng ka Ri India. Ula ong ba ka jingtei ia kane ka campus kan nang kyntiew kyrdan shuh shuh ia ka Shillong kum ka jaka pdeng ha ka pule ka dangle bad ka jingthaw policy hapoh ka thain Shatei Lam Mihngi.
U Gyaneshwar Kumar Singh, DG & CEO ka IICA, ula u la pynpaw ba kane ka dei ka khyllipmat kaban sah jingkynmaw, haba pyntip ba ka Shillong Campus ka dei ka “Khun ba nyngkong eh jong ngi shabar jongka Delhi-Ka dak jong ka jing pyniar ia ka bor treikam bad ka jingpynkupbor”.
Ula ban jur ia ka bynta jong kane ka Campus thymmai ha kaban kyrshan ia ki nongsengkam sengjam, ka jingai jinghikai ban iakot bor, bad ka jingsynshar kaba bha kaba iaid ryngkat ryngkat bad ki kam ba hakhmat eh jong ka Ri kum ka jingpynsuk ban iatrei iaktah, Atmanirbhar Bharat bad ka Vikshit Bharat @2047.
Haba kdew ia ka jingiohi jngai jong u Myntri Rangbah Duh Narendra Modi bala pynpaw ha ka Rising North East Initiatives, u DG ula ong ba u Myntri Rangbah Duh ula niew ia ka thain Shatei Lam Mihngi kum ka “Ashtalakshmi of India”-ka thain kaba riewspah ha ka jingdon iaki jaidbynriew bapher bapher, ka sap bad ki lad ki lynti. Haba iaid ryngkat bad kane ka jingiohi jngai, ula ong “Ka IICA ka sngewsaronng ban iadonbynta lang ha ka jingpynkylla dur ia ka thain na ka jaka ba sha kyndong sha ka kor (engine) ka ban pynroi ia ka India ba thymmai”.
Da ka jingkynshew ba T.100.95 klur hapoh ka Prime Minister’s Development Initiative for North East (PM-DevINE), ka Shillong Capus kan treikam kum ka jaka pdeng jong ka thaiñ na ka bynta ki jinghikai ba kyrpang, ka jingwad bniah, bad ka jingai jingmut halor ki polisi ha kylleng ki bynta ba kongsan—Corporate Governance, ESG.CSR, Competition Law bad Board Leadership.
