Nongstoin, Rymphang 15: Kawei ka longkmie ba 38 snem ka karta, na Riangpoit Thymmai, West Khasi Hills, ka la shah pyniap dusmon ha ki runar hadien ka jingshah leh be-ijot, kaba la jia ha ka sngi ba ar ha kawei na ki jaka khlaw kaba don ha katei ka shnong.
Ki heh pulit ka West Khasi Hills District, ki pyntip ba ki Pulit kila ioh pdiang ia ka jingujor ejahar na kiba haiing jong kane ka Longkmie kaba la don san ngut ki Khun, ba pyntip ia kane ka jingjia.
Ki iathuh ba kane ka Longkmie ka dei kaba im da kaba thang rnga ha kawei na ki khlaw kaba don ha katei ka shnong. La iathuhba bunsien kane ka Longkmie ka ju sah ruh ryngkat bad ki khun lane bad kiba haiing hasem sha khlaw ban thang rnga. Hynrei ha ka step sngi ba ar ka la wanphai sha iing bad mih biang ha ka por 6:30 eiei mynstep ban leit biang sha khlaw ban thang rnga.
La ong ha ka ejahar ba katba kane ka Longkmie ka dang don ha lynti ban leit phai, ki riew runar ki la ap thap lypa ha ka jaka ba la tip kum ka phot kynthei, ki la thom bor ia ka bad hadien ba ki leh be-ijot, ki la shim syndon ruh ia ka jingim jong ka.
Na ka liang ki heh pulit ha ka step sngi balang ki la hiar sha katei ka jaka ban tohkit bad ki la wanrah noh ia ka met iap na ka bynta ka post mortem.
Ki pulit ki la register case halor kane ka jingjia bad ha kajuh ka por, ki la sdang ban lap sabut ia ki runar kiba leh ia kane ka kam, ha kaba shen kin sa ioh ban leit kem bad pynshitom katba shong ka ain.
