Shillong, Lber 16: Ka North East Slow Food & Agro-biodiversity Society (NESFAS) hynne ka sngi, kala pynlong ia ka jingpyni nam iaka rukom shet Krai da ki nongshet Krai ka ri India bad kiba napoh ka jylla Meghalaya.
Ia kane la pynlong kum shi bynta ban kyntiew iaki mar rep bala pynmih hapoh ka jylla kum u Krai (Millet) bad ia kane ka prokram la ai kyrteng ka ‘Celebration of Millet and Indigenous Peoples Meghalaya’ bad ia kane ka prokram la pynlong hapoh ka ophis treikam NESFA kaba don ha Laitumkhrah Shillong.
Ha kane ka sngi la wan ban sakhi da ka myntri ka tnat ka rep ka riang ka Dr. Ampareen Lyngdoh haka jingdonlang u bah George B Lyngdoh, ki ophisar ka tnat ka rep la riang, ki nongkit kam ka NESFAS, ki riew paidbah bad ki samla khynnah pule.
Haba kren ha kane ka sngi, ka myntri ka tnat ka rep ka riang ka Dr. Ampareen Lyngdoh kala iai ban ba ka donkam ban kyntu iaki briew ban bteng iaka rukom rep bad pynmih Krai (Millet) bad naka liang ka sorkar ruh kan ia leh katba lah ban wanrah ki jingkyrshan iaki nongrep Krai.
Ka Dr. Ampareen kala ong ba ia u mar rep Krai (Millet) la iathuh kum uwei na ki mar rep ba donkam hynrei ka long kaba sngewsih ban iohi ba une u mar rep ula sdang ban duhjait ym tang hapoh ka jylla hynrei ha kylleng ka pyrthei.
“Ka long kaba donkam iaka sorkar ban kyrshan iaki nongrep Krai bad kumjuh ruh ka donkam iaki paidbah ban ai ka jingkyrshan iala ki nongrep kum shi bynta ban pynkhi im biang ia une u jait mar rep uba la sdang duh jait noh” la ong ka Dr. Amapreen.
Naka liang ka kong Bibiana kaba dei kawei na ki nongrep bad nongpynmih Krai na ki thain nongkyndong ka la ong ba ka jingdon ka NESFAS ka long kum ka umpohliew iaki nongrep ki ba pynmih bad bad rep Krai namar ka la iarap shibun ban pyniaid iew ia une u mar rep.
