Tura, K’Lyngkot 26: U Myntri Rangbah ka Jylla Meghalaya u Conrad K Sangma u la pynher ia ka lama ri India ha Tura ban rakhe ia ka Republic Day kaba 76 snem jong ka ri.
Ha ka jingkren jong u kaba 40 minit, u Myntri Rangbah ka Jylla u la batai ia ka lynti iaid jong ka Jylla ban kiew shaka roi ka par.
U Conrad u la kren shaphang ka jingroi kaba iaryngkat lang bad kaba la ai bad pyntrei sha ki bynta bapher bapher jong ka Jylla.
Haba kren shaphang ka thong ban kot 10 Billion Dollar Economy ha u snem 2028 da kaba pynkiew ar shah ïa ka GDP jong ka Jylla, u Conrad u la pyntip ba ka Jylla ka la pynkhreh ban pynurlong ïa ka thong bad ki jingbei tyngka kiba heh bha ki dang ïaid ha ki kam pynroi bapher bapher.
“Ka GDP jong ka Jylla jong ngi ka la kiew na ka T.23,235 klur ha u FY15 sha ka T.53,057 klur ha u FY24. Ki bynta ba kongsan kum ki surok, ki iing ki sem, ka jingpynbiang um, ka bor ding, ka kam jngohkai pyrthei, bad ka IT ki pynlong ia ka jingroi. Ha kine ki san snem ba la dep, ka Jylla ka la shna palat 2,500 km ki surok hapoh ka PMGSY. Ka sorkar ka dang don ha ka jingthmu ban pynheh ia ka kad liengsuin jong ka Shillong khnang ban lah ban pdiang ia ki liengsuin kiba kham heh bad ban pynbha ia ka jingpyniasoh” la ong u Conrad.
Halor ka jingpynbha ïa ki surok jong ka Jylla, u Conrad u ong, “Ha kine ki ar snem ba la dep, ka Sorkar ka la mynjur ïa ki jingtrei surok kiba kynthup haduh 568 km ban kyntiew ïa ki lad pyniasoh hapoh ka Jylla. Ka jingtrei halor ka surok bah Shillong-Dawki bad ka surok Tura- Dalu kala iaid shakhmat, bad la mynjur ia ka lynti iaid kaba thymmai na ka bynta ka surok Pynursla Bypass. Ki projek kum ka Shillong Western Bypass, bad ka surok kaba stet bha na Mawlyngkhung sha Panchgram ruh ki dang ïaid shakhmat” u la pyntip.
U Conrad u la pyntip ruh ba lyngba ki projek externally aided project, ka Sorkar kala pynroi ia ki jingtei surok ha ka thain kiba jrong haduh 500 kms.
“Ka Surok Garobadha-Dalu, ka Surok Pasyih-Garampani, ka Surok Umling-Patharkhmah, bad ka Surok Umsning-Jagi, kaba thmu ban pynbha ia ka jingpyniasoh surok ha baroh ki thain jong ka Jylla. Da kaba pynshong nongrim ha ka jingtreikam bha jong ka Jylla ha ka liang ka surok, ka Sorkar India, dang shen ka la mynjur ïa ka Mega Project na ka bynta ban pynbha ïa ka surok da kaba bei tyngka 2500 klur tyngka. Hapoh kane ka projek yn shna palat 300 Km ki surok kiba lah ban ïakhun pyrshah ïa ka jingkylla ka suiñbneng kiba don ar lynti bad kane kan ïarap ban pynurlong ïa ka ‘Mission 10’ jong ngi” u la bynrap.
