Shillong, Naiwieng 24 : Kawei ka pla rong iong kala pynher syrngiew ia ki paidbah ka sor Shillong hynne ka sngi Nyngkong, namar ka jingsuba don bomb.
Ia kane ka pla la lap ba buh hakhmat ka khyrdop jong ka State Bank of India (SBI) Main Branch, kaba don ha Police Bazaar.
Ki Pulit haba ioh jingtip ia ka jingdon ka pla ba ieh ha katei ka jaka, mar mar kila leit ban kerkut ia ka jaka bad kila khang syndon ia ka leit ka wan ki kali kynthup ki briew ba kin iaid.
Ka kynhun ki Pulit Bomb Squad kila wan poi mar mar ha kane ka jaka bad ha ryngkat ki tiar iada, kila leit ban plied ia kane ka pla ban tohkit ia kaei kaba don hapoh.
Ha kane ka jingtohkit, ka kynhun kala lap ba ha kane ka pla, ki don tang ki jain bad kiwei ki tiar misteri kynthup u tyrnem.
Ia kane ka pla la rah noh da ka kynhun bad aiti sha ki Pulit ka Sadar Police Station, ban tohkit khnang ban lap ia u trai.
