Buh kylli la ka Meghalaya ka dang hap ha India
Shillong, K’lyngkot 19 : Ka Hynniewtrep Youth Council (HYC) hynne ka sngi Thohdieng, kala pynher ia ki balloon iong ha Shillong kum ka dak ban iakhih pyrshah ia ka jingpynslem jong ka Sorkar Pdeng ban pyntreikam ia ka Inner Line Permit (ILP) bad ban pynrung ia ka ktien Khasi hapoh ka Khyrnit ba phra jong ka Riti Synshar ka Ri.
Ia kane ka jingiakhih la pynlong hapdeng ka jingpahara kaba jur bha namar ka jingwan jong u Myntri kam Pohiing ka Ri Amit Shah sha Jylla ban pyniaid ia ka jingialang jong ka North Eastern Council (NEC).
Ki Dkhot ka HYC la iohi ba kila shong hapdeng jong ka surok ryngkat ka rah placard bad pyrta slogan ha lad Barik markhmat u mot dur jong u Kiang Nongbah.
Haba iaren bad ki nongthoh khubor, u President ka HYC samla Roy Kupar Synrem ula ong ba ka jing iakhih ka long ban phah ia ki jingkylli sha ka Sorkar Pdeng lyngba u Myntri kam Pohiing ba la ka Sorkar Pdeng ba ialam da ka BJP ka niew ne em ia ka Meghalaya kum shibynta jong ka Ri India b aka shimpor ban rai pyntreikam ia ka ILP ha kaban iada ia ki paid riewlum jong ka Jylla.
“Lada ka (Sorkar Pdeng) sngew ba ka Meghalaya kam hap shuh ha India ka dei ban kren shai khnang b aka Jaidbynrew bad ka Jylla kan sngewthuh kumno ban jam shakhmat namar ka jingle kmienah ka pynsngew ia ngi ba ka BJP ha Delhi kam shym la niew ia ngi kum kiwei pat ki Jylla kynthup ka Manipur. Lada ka Manipur ka lah ban ioh ILP tang da ki bnai hynrei balei ka shim por ia ka Sorkar ban ai ILP ia ka Jylla Meghalaya” ula ong.
Ula ong ba manla ka por haba ka seng ka iakynduh ia u Myntri Rangbah ka Jylla bad ruh ia u Symbud Myntri Rangbah, ki ju pyntip ba ka Home Ministry ka dang bishar ia kine ki artylli ki kam kiba la sahteng bad ka Sorkar Pdeng-kawei ka dei ka ILP bad kawei ka jingpynrung ia ka ktien Khasi ha ka khyrnit ba phra.
Haba kylli, une u Nongialam ka HYC ula ong ba watla ka Meghalaya ka dei ka lynti iaid sha kiwei pat ki Jylla hynrei kam don jingeh pat ha kaban pyntreikam ia ka ILP.
“Ngi lah ban thaw ia ki lad treikam ha kaba ki briew ki lah ban iaid lyngba ka Jylla khlem ka jingwit. Ka shong ha ka rukom treikam ba kumno ngin pyrrkhing ia ka jingiaid ki briew bad kaei kaba ngi kwah ka long ban pyrrkhing ia ka jingrung jingmih ki briew hapoh ka Jylla bad shabar ka Jylla khnang ba kin nym ioh long ki nongshongshnong ba pura jong ka Jylla.
Ha kajuh ka por, une u Nongialam ka HYC ula kyntu ia ka Sorkar Jylla ba kan shim ia ki sienjam ha kaban wanrah bad mynjur ia ka Meghalaya Residents Safety and Security ( Amendment) Bill, 2020 ka ban pyrrkhing ia ka jingrung jingmih ki briew hapoh ka Jylla.
