Shillong Nohprah 23: U Symbud Myngtri Rangbah ka Jylla u Bah Prestone Tynsong hynne ka sngi, ula pynhap pyrda ia ka jingrakhe Silver Jubilee jong ka skul Little Star, kaba don ha Umkor Pynursla.
Haba kren ha ka jingialang, u Bah Prestone ula ai ka jingiaroh ia ki nongpyniaid kiba la seng ia kane ka skul ha u snem 2000 ban ai jingnang jingstad ia ki khynnah ka thain Pynursla.
Ula iaroh ia ki khynnah skul kiba la pyni ia ka sap ka phong ka jongki ha ka jingrwai bad jingshad bad ula kyntu ia ki nonghikai bad ia ki khynnah skul ba kin bteng ban trei shitom khnang ba shisien ka sngi kane ka skul kan poi sha ka kyrdan kaba shajrong.
U Bah Prestone uba long ruh u MLA ka Pynursla Constituency ula pynbna ban ai T.8 Lak khnang ba ka skul kan ioh tei pyndep ia ka iingskul bad ula ong ruh ba ha u snem ban wan, yn sa iashong ban iakren bad ki bor pyniaid jong ka skul na ka bynta ban kyntiew ia kane ka skul da kaba pynioh ia ki kor ki bor Computer ban pyndonkam ha ka jingpule ka jongki kaba man la ka sngi.
Ha kane ka jingrakhe u Bah Prestone ula pyllait paidbah ia ka kot sah kynmaw ne Sovenir ha kaba la iadonlang u Bah Rahbok Tynsong, ki nongpyniaid jong ka skul, ki nongialam shnong bad kiwei kiwei.
