Nongpoh, Naitung 23: Ka lympung ialehkai Badminton kaba la pyniaid da ka Ri Bhoi Youth Federation Pahamlapong bad Pahamsohthri Unit kaba la tip kum ka 1st Badminton Tournament kala kut noh hynin ka sngi Saitjain ha kaba la sakhi ia ka jingwan iashimbynta ki samla na kylleng jong ka Ri Bhoi District.
Ia kane ka lympung ialehkai Badminton la wan ban pynhap pyrda da u Bah Ferdynald K Kharkamni, President ka KSU, North Khasi Hills District unit kum u kongsan ha ka jingiadonlang ruh u Bah Mathew Makdoh, Working President ka NSCA, u Bah Nelson Sohkhlet, President ka Nongpoh Badminton Club, Bah Bawan Marwein, Sport Secretary ka RBYF nalor ki nongkitkam jong ka Pahamlapong bad Pahamsohthri Unit.
Ha ka jingïakhun ia ka phainal, na ka liang ki nongialehkai ha ka Men’s Single, u Kieffer Shullai ula lah ban pynliem noh ïa u Kyrshan Thabah ban rah ïaka nam lahduh jong katei ka lympung. Ha ka Men’s Double ka kynhun jongu Kieffer Shullai bad u Kynsai kila pynliem noh ïa u Orpan Nongrum bad u Phrangsngi Nongbri.
La sam ia ki khusnam pisa sha ki nongjop ha katei ka sngi bad kumjuh ruh kiba rem ryngkat ki momento, ïa ka nam Best Player la rah da u Arpan Nongrum bad ka nam Best Veteran Player ba la rah da u Mihpli Wahlang.
U Bah Ferdynald Kharkamni, u la ai jingiaroh ia ka RBYF kiba la shimkhia ban pynlong ia kum kane ka lympung ialehkai badminton kaba long ruh kum ka rynsan na ka bynta ki samla ialehkai kiba don ia sap ialehkai badminton na Ri Bhoi District khamtam ruh kum kine ki lympung kin pynlait ia ki samla ban pynlut kai ia ka por ha kino kino ki kamkai ne ki kam sniew.
Ha kane ka sngi, u Bah Ferdynald Kharkamni, u la noh synniang ruh da ka song pisa kum ka jingiarap ia ka RBYF Pahamlapong bad Pahamsohthri Unit ban nang kyntiew ia kane ka kam ialehkai.
