Nongstoin, Iaiong 08: Ka FGEM Higher Secondary School Nongspung West Khasi Hills District ha ka 6 tarik u Iaiong, kala pynhap pyrda noh ia ka 13th Annual School Sports Meet ha kaba la pynlongia ki jingialehkai ki bapher bapher.
Kumba ju leh man la ka snem ka FGEM HSS ka pynlong ia katei ka jingiakob ialehkai, kum ka jingplie lad plie lynti ia ki khynnah ban pyni ia ka sap ka phong kumjuh ban don ia ka mynsiem iakhun la kadei ha ka kam ialehkai ne ha ka pule puthi.
Ha katei ka jingiakob ialehkai la pynlong iaki Football, jingiakob mareh bad kiwei kiwei, ha kaba ka Blue House kala ioh iaka nam lahduh, katba ka Yellow House kala long ka Lahduh ha ka March Pass bad ia ka nam Best Discipline Team la ioh da ka Red House.
La plie ia katei ka jingialehkai da u Babu D.Marbaniang, Headmaster Christ Disciple Girls Sec.School Upper New Nongstoin bad la pynwai ia kane ka lympung da kaba pynhap noh ia ka lama da i Miss R. Lyngkhoi ryngkat ka jingiadon lang u Principal, ki Nonghikai, ki khynnah skul, kmie ki kpa bad kiwei kiwei bad kaba la kham pynsngewtynnad ia baroh kadei ka jingleh Drill ki khynnah skul.
U Babu D.Marbaniang ula kyntu ia ki khynnah ban kiar na ki jingdih ba sniew kiba ktah ia ka koit ka khiah bad ba kin pynleit jingmut ha kaban minot thop ha ka jingpule ban poi sha ka thong.
