Shillong, Risaw 21: Ka Directorate of Sports & Youth Affairs kala pynlong iaka Meghalaya Youth Exchange Programme 2023 naduh ka 16 tarik u Risaw bad ia kane ka prokram la pynkut noh ha ka sngi Thohdieng ha ka jingialang kaba la long ha Convocation Hall, NEHU Campus Mawkynroh, Shillong.
Ha katei ka prokram kaba la sdang ha ka 16 tarik u Risaw la don palat 700 ngut ki samla kynthei bad shynrang na ki 12 tylli ki district jong ka jylla kiba la wan ban iashimbynta bad ia kane ka prokram la pynhap pyrda noh da u Myntri ka tnad Sports & Youth Affairs Bah Shakliar Warjri, kum u Kongsan ha kaba la iadonlang ka Director jongka tnad Sports & Youth Affairs ka Kong Isawanda Laloo, ki heh ophisar sorkar bad kiwei kiwei.
U Bah Shakliar Warjri ula pynpaw iaka jingsngewtynnad ban iohi ia ka jingkmen bad ia ka jinglah ki samla ban pyni iala ka sap ka phong lyngba katei ka prokram bad ula kyntu ia ki nongiashimbynta ba kidei ban shimkabu ia ka rynsan kaba ki ioh ban pyni ia la ka sap ka phong bad ha kajuh ka por ban peit bniah ruh ia ka buit ne ka sap ka jong kiwei ban ban ialeh ban kyntiew bad pynwandur bha iaka sap lajong bad ba kidei ruh ban tip shaphang ka kolshor jong ki jaidbynriew bapher kiba don hapoh kane ka jylla.
U Bah Shakliar ula ai jingbatai ruh ha lor ki skhim ki bapher bapher jong ka sorkar kiba la pynwandur naka bynta ban kyntiew bad ban saindur ia ka sap ka phong jong ki samla ka jylla bad ban kyntiew ia ka rukom im ka jongki.
Ha kane ka sngi kut, u Kongsan ula sam ia ki khusnam bad ki sertiphiket sha ki nongjop ha ki jingiakob ki bapher bapher.
Ha katei ka Youth Exchange Programme la pynlong ia ki jingiakob rwai bad shad tynrai, Guitar & Flute Competition, Debate & Extempore Speech, One-Act Play halor ka mat “Mission Life,” ka Talent Hunt bad kiwei kiwei.
