Shillong, December 21 : Ka Seng Samla Pynthorumkhrah Parish, St. Peter & Paul, hynne ka sngi u Blei kala pynhap pyrda noh ia ka jingrakhe ia ka Jubliki ksiar ne Golden Jubilee (50 snem) bad ia ka 12th Convention.
Ka Jubili Ksiar kadei ka jingiaid lynti jong ka Seng Samla naduh ba lah seng ia ka ha u snem 1975, kaba pyni ia ka jingkiew bad jingroi ha kine ki phew snem kiba la leit noh, ka jingwanrah ia ka jingkylla, ki jingtynjuh bad ka jingiaid shaphrang katkum ka jingiaid ka juk mynta la bun phew snem. Na ka jingsdang ia ki snem jong ka jingiakhun ia ki jingeh bad ka nongrim kaba haduh mynta, kaba ki dkhot kila shimkhia ban pynwandur ia ka seng.
Ha ki snem 1975, 1980 bad 1990, ka Seng Samla kala sakhi ia ka jingkiew suki lyngba ka jingwan iashimbynta ki samla kiba la nang la stad bad kiba don ia ka jingkitkhlieh ban pynkhlain ia ka jinglong nongialam bad ban tei ia ka seng hapoh jong ka Parish bad ha ka imlang sahlang.
Ha ka sngi pynkut ia ka jubili la sdang ia ka prokram da ka Holy Mass kaba la pyniaid da u Most Rev. Bernard Laloo, Bishop jongka Diocese of Shillong, ha ryngkat ka jingdonlang u Parish Priest u Fr. Lawrence L.Nongkseh bad u Fr. Festus Shadap uba long u Assistant Parish Priest.
U Bishop Bernard Laloo ula kyntu ia ki samla ba kin im ia ka jingim kaba khuid bad ban long kiba la pynkhreh bad ula pynkynmaw ia ki jingiai bteng ban iakhun ia ki bor jong ka jingsniew, kiba pyrshang ban pynjot ia ka jingim jong ki samla bad ula pynshlur ia ki ba kin heh kin san da kaba iajan bha bad u trai Jisu Khrist bad ban tei ia ka jingiatylli bad ka jinglong kawei ha ka jingngeit.
Kum shi bynta jong ka jingrakhe ia ka jubili, ka Seng Samla ryngkat bad ki dkhot ki barim kila pynlong ia ka jingiakynduh kaba kyrpang ban ai burom ia ki nongialam ki barim.
Ha kane ka jingrakhe la pyllait paidbah ruh ia ka Golden Jubilee Souvenir da u Bishop Bernard Laloo ha kaba la iadonlang u MLA ka Pynthorumkhrah Constituency u Bah A.L. Hek.
Ka Seng Samla kala pynkup burom ruh ia ki nongialam ki barim kiba la noh synniang bha ia ka seng, kynthup lang ia ka Uni Mary Kharkongor kaba la thaw ia ka Anthem jong ka Seng Samla bad Bah Dominik K. Lanong, uba la thaw ia ka Constitution ne riti treikam jong ka seng.
La pynkut ia kane ka jingrakhe ia ka jubili ksiar da kaba pynhap ia ka lama da u Fr. Festus Shadap, Assistant Parish Priest ha ka jingdonlang u Bah AL Hek.
Hashwa ban pynkut ia kane ka jingrakhe, la pynlong ruh ia ka prokram kaba iadei bad ka kolshor ha kaba la ioh ia ki jingrwai, jingshad bad ka jingak drama da ki dkhot ki barim jong ka Seng Samla.
Kane ka drama ka batai shaphang ki sngi kiba nyngkong jong ka Seng Samla, ha kaba kumno kala sdang bad ia ki jingeh kiba ka mad da ki nongialam kiba la seng ia ka, kaba la kit jingmut bha ha kane ka jingrakhe ia ka jubili.
 bad ia ka 12th Convention.){kind=link}