Pynduna ia ki jingpynlut ki bym don jingmut, ong u DyCM ia ki District Council

Shillong, Nailar 02 : U Symbud Myntri Rangbah Bah Prestone Tynsong ula ai jingmut ia ki lai tylli ki Autonomous District Council ka Jylla kynthup ka Garo Hills Autonomous District Council (GHADC) ba kin pynduna ia ki jingpynlut ki bym don jingmut khnang ban lah weng ia ka jingeh haba iadei bad ka jingsiew tulop ia ki nongtrei.

Kat kum ka jingong jong u, ki ADC ki dei ki autonomous body ba don ka jingkitkhlieh ban pynmih pisa nalade bad ban pyniaid iala ka pla tyngka.

Ki Nongtrei ka GHADC kim shym la ioh tulop la palat 42 bnai, kaba la pynsngewkhia halor ka bha ka miat jong ki bad ka rukom pyniaid ia ka pisa tyngka hapoh ka Council.

“Phi tip bha ba ki lai tylli ki ADC ki dei kiba treikam laitluid bad ki dei ban pyniaid bad pynmih hi nalade ia ka pisa. Nga thikna ba kat kum ka jingkotbor jong ki, la thungkam ia ki briew kat kum ka jinglahbor.Namar kata, haba iadei bad ki lai ADC la ka dei ka KHADC, JHADC ne GHADC, nga la iohi ba ym tang mynta u snem hynrei la bun snem, kane ka jingjia ka iai jia ha kaba ki nongtrei kim shym la ioh tulop 6-7 lane 8 bnai lait noh ha KHADC lem kumta, nga kumta ha phi ba kane kala jia la bun bun snem ha kiwei ki ADC” ula ong.

“Khatduh hi ka Sorkar kam don eiei ban ong palat hynrei ngi shu kwah ban ai jingmut ia baroh ki lai ADC ba kin sngewthuh bad pynduna ia ki jingpynlut ki bym don jingmut namar lada phim leh ia kata, lada phi kamai T.100 bad phi pynlut T.200, iathuh ia nga kaei kaban jia ba phi pynlut tam T.100 na kaei kaba phi pynmih?” ula ong.

U Bah Prestone ula kubur ba ka jinglong jingman ka long kaba ktah bha haba bynrap “Wat lada phim ioh tulop 2-3 bnai, kam sei satia ka kam kai. Kumno ki Nongtrei ki lah ban im lada kim ioh ia ka tulop ba 2-3 bnai”.

“Mynta ngi ieh ha ka jingstad jong ki ADC. Ki hap ban pyniaid bha ia ka pisa pilain bad sngewthuh ia ki jingeh ba ki iakynduh” ula bynrap.

Halor ka jingkynnoh pyndonkam bakla ia ka song pisa ba T.100 klur na ka Special Assistant Grant sha ka GHADC kaba dang don ha ka jingbishar hapoh ka Lokayukta, u Bah Prestone ula pynpaw ba ka dang kloi palat ban kynthoh halor kane ka kam namar ba ka audit ka dang iaid shakhmat.

“Nga tharai kin dei ma ki, ki ban pynshisha bad wad la ka jingpyndonkam bakla ka jia ne em. To ngin ia iap tad haduh ban da wanrah ia ka kaiphod” ula ong.