Shillong, Nohprah 13: Ki Pulit ka tnad pyniaid kali Shillong Traffic Police (STP) hynne ka sngi Balang,kila pynduh noh ia ki 181 tylli ki ‘Silencer’ ne ki tyndong pynsawa ba shu pyndait hi ha ki kali bad thuk thuk ban pynmih iaka jingsawa kaba jam.
Ia kane la lamkhmat da u Superintendent of Police (SP) ka East Khasi Hills u Bah Sylvester Nongtnger, u SP (City) u Bah Vivek Syiem bad u SP Traffic Branch u Kamakhya Prasad bad kiwei kiwei ki heh Pulit bad ia kine ki ki tyndong pynsawa la pynduh bad pynpra ha phyllaw jong ka Police Reserve Shillong.
Ia kine ki tyndong pynsawa, la pynduh bad pynpra da kawei ka kali Road Roller bad ia kine ki tyndong pynsawa la wanrah na kylleng ki OutPost ka nongbah Shillong hadien ba la ioh ban weng noh ia ki da ki Pulit pyniaid kali.
Ha ka jingiakren bad u bah Sylvester ula iathuh ba kine ki 181 tylli kiba la shah pynpra kidei napdeng ki 320 tylli ki tyndong pynsawa ba ki Pulit kila ioh bat ha ki sngi ba pynlong ka jingkhynra.
U Bah Sylvester ula iathuh, ba nangne shakhmat, ka jingbteng ban khynra ia ki kali bad ki ar shaka kan dang iaid shaid shaid bad yn sa khynra ruh wat ia ki kali kiba tah ïit ïong khamtam ha ki por mynmiet ba bun ki khynnah shongshit kiba ju niah khlem akor bad khlem da don ia ki lisen.
Lah ban kdew ba kane kadei ka sien ba nyngkong ba ki Pulit ka tnad Shillong Traffic kala pynduh bad pynpra iaki tyndong pynsawa ba shu pyndait be-aiñ ha ki thuk thukbad ki kali.
