Shillong, Lber 16 : Ka Sorkar Jylla kala pynduh noh ia ka jingthmu ban shna ia ka surok fly-over haduh Barik hynrei kan shu pynheh noh ia ka surok na Jingkieng Umshyrpo sha Barik Point da ka surok 4-lane.
Ka rai ban pynduh noh ia ka fly-over kala mih hadien ba ka jingiasyllok bad ki shipai lem bad ki borkhmih ia ka National Highway, ka shem ba ka fly-over ka long ka bym lah ban pyntrei.
“Ka jingthmu ban shna ia ka surok na suin kam i long satia ban pyntrei. Ngi la rai dang shen ba naduh Jingkieng Umshyrpi haduh Barik Point, ngin pynkylla noh ia ka surok sha ka 4-lane ha ka jaka ka surok suin” ong u Symbud Myntri Rangbah ba khmih ia ka tnad PWD (Roads) Bah Prestone Tynsong haba iakren bad ki nongthoh khubor ha ka sngi Nyngkong.
Kane ka jingpynkylla kala mih hadien ka jingialang bala pyniaid da u Myntri Rangbah ka Jylla Conrad K Sangma bad kaba la wan iashimbynta da u GOC ki shipai.
“Ngi la iakren ia baroh kiei kiei bad ngi la bthah ia ka PWD bad NHIDCL lem bad ki Heh shipai ba kin ialeit jurip lang bad ban khein ba haduh katno ka jaka ngi donkam. Hynrei la shim ia ka rai ha katei ka sngi ba kham lah ka surok 4-lane ban ia ka surok suin” iathuh u Bah Prestone.
Ula bynrap ba ki shipai kila ai ka jingmynjur da ka ktien ba kin ai ia ka jaka ba donkam hashuwa ban leh ia ka sorjamin.
Halor ka project surok Shillong-Dawki, u Bah Prestone ula iathuh ba ki kam ki jam kila iaid ha ka lynti kaba dei.
“Ia mynta ka kompani..kala pyrshang katba lah ban pynthikna ba kan pyndep ia ka project hapoh ka por bala buh” ula iathuh.
