Agartala, Risaw 14: Ka Tripura unit jong ka CPI-M kala kynthoh pyrshah ia ka BJP da kaba ong ba kane ka party kala pyndonkam ia ka ophis jong ka President ka ri India na ka bynta ki jingioh nong ha ki kam sain hima sima.
Ka Seng CPI-M ka Tripura kala ong ba ka BJP kala pyndonkam bakla ia ka ophis jong ka president ka India na ka bynta ki jingioh nong ha ki kam sain hima sima, kata da kaba phah ia kane ka president ba kan plie ia ka hostel kaba dang dep tei tang mar shiteng bad ban buh ia u mawnongrim na ka bynta ki surok barim.
U Secretary ka Tripura CPI-M u Jitendra Chaudhury ula ong, “Ka BJP kala pulom ban wanrah ia ka roi ka par ha ka jylla ha kane ka jingsynshar ka jong ka.Kila shukor ia u8 paidbah lyngba ki skhim ki jong ki.”
“Mynta ka BJP kala pyndonkam bakla ia ka ophis jong ka President ka India na ka bynta ki jingioh nong ha ki kam sain hima sima.Kila pynlong ia ka ba kan plie ia ka MLA hostel ka bym pat dep tei pura, ban kaweh lama na ka bynta ki rel kiba la dep don lypa bad ban buh mawnongrim na ka bynta ki surok barim,” kynnoh utei u heh ka CPI-M.
Ha ka sngi Balang ba la lah, ka President Droupadi Murmu kala plie ia ka judicial academy kaba thymmai jong ka jylla Tripura hapoh Narsingarh ha Agartala.
Nalor kata kala plie ruh ia ka dur nongmuna na ka bynta ka campus jong ka National Law University ka Tripura.
Hadien kane kala pynlong ruh ka jingleit jurip ia ka central tea processing factory hapoh Durgabari Tea Estate hajan Agartala bad iamir jingmut ruh ba ki nongtrei sla sha ha kane ka jaka.
Katba hynnin ka sngi Palei ka President Droupadi Murmu kala kaweh ia ka lama na ka bynta ka jingpyniaid ia ki artylli ki rel kit paidbah, kawei na ki kaba pyniasoh ia ka Tripura bad ka Manipur ha ka sien kaba nyngkong eh.
Ka Murma kala kaweh lama na ka bynta ki artylli ki rel, kata ka Agartala-Khongsang Janshatabdi Express bad ka Agartala-Kolkata Express na Agartala kaba long shibynta ban pyniasoh hapdeng ki jylla jong ka thain.
