Shillong, Rymphang 12: U Lat ka Jylla Meghalaya u CH Vijayashankar hynne ka sngi Palei, ula pynkup burom ia ki 10 ngut ki riewpaw khmat ba don jingduna ha ka dkhot met ha ka jingialang kaba la pynlong da ka Commissioner for Persons with Disabilities, Social Welfare bad ka Lok Bhavan.
Kine kiba la shah pynkup burom ki kynthup ia u Ferdinand Lyngdoh Marshillong, Anjelina Tynhiang, Simseng M. Sangma, Willingson Manar, Orphon Nongrum, Shanborlang Siangshai, Madhu Subedhi, Keneddy Rynjah, Jepora T. Sangma bad Pillbert Hanse.
Haba kren ha ka jingialang u Lat ula iaroh ia kine kiba la ioh ia ka khusnam halor ka jingdon ia ka mynsiem kaba skhem bad ka pynpaw ba kane ka jingjop ka jongki ka long kum ka jingpynkynmaw kaba khlain ba ka jingduna ha ka dkhot met kam dei satia ka jingdkoh hynrei kadei ka dak jongka jingkhlain bad ka jingshlur.
U Lat ula banjur ia ka jingkongsan ban ithuh ia ka daw tynrai jong ka jingduna ha ka dkhot met bad ban pynkhlain ia ki lad jingiada. Ula banjur ba katba ka jingpynkupbor bad ka jingkynthup lang ka long kaba kongsan, dei ban phaikhmat ruh ha kaban lap noh dang kloi, ban ai ki jingpynsngewthuh paidbah, ban phah sumar mardor, ka jingai ka koit ka khiah ia ki kmie bad ki khunlung, ka jingshngain ha ki surok bad ka jingiada ia ka koit ka khiah jong ki paitbah ban lah ban kiar na katei ka jingpang jong ka jingduna ha ki dkhot met.
Ula kyntu ia baroh ki tnad kiba dei khmih ba kin shim ia ki sienjam bad ban iatreilang ban iada ha ryngkat bad ban ai jingsumar bad ka jingkyrshan.
U Lat ula pynpaw ba ha ka ri India, kum ka nongiasoi bad iadonbynta bad ka United Nations Convention on the Rights of Persons with Disabilities (UNCRPD), ka iengskhem ha ka jingkular ban pynneh ia ka burom, ka hok bad ka jingiashimbynta pura jong ki briew kiba don jingduna ha ki dkhot met.
U Lat ula banjur shuh shuh ba ka jingiaid shakhmat kaba shisha jong ka imlang sahlang kadei kaba la thew da kumno ka leh ia ki dkhot kiba shah ktah. Ula pynpaw ba ka Rights of Persons with Disabilities Act, 2016 ka ai ia u paia ain ba khlain ban pynthikna ia ka jingioh kaba ryngkat, ka jingioh ia ki lad bad ka jingbym shah lehbein bad ula kyntu ia baroh kiba donbynta, ki tnad sorkar, ki jaka pule, ki kynhun jong ka imlang sahlang bad ki nongshong shnong ba kin iatreilang ban pynkylla ia ka mynsiem jong katei ka Ain sha ka jingleh kaba shisha ha madan. Ula pynshlur ia kine kiba la ioh ia ka khusnam ba kin bteng ban trei shitom ban poi sha ka thong bad ula pynthikna ia ki ba ka jylla kan iai bteng ban kyrshan ia ki.
U Principal Secretary u HC Choudhary ula pynpaw ia ka jingkongsan jong ka jingkynthuplang ia baroh bad ban pynkup bor ia ki briew kiba don jingduna ha ki dkhot met ha kaban tei ia ka imlang sahlang kaba ia ryngkat bad ka bym shah liang.
U Commissioner & Secretary u Pravin Bakshi, ula pynpaw ba ka sorkar jylla ka iengskhem ha kaban pyntreikam pura na ka bynta ka bha ka miat hapoh jong ka Rights of Persons with Disabilities Act, 2016.
Katba u Chief Adviser jongka Meghalaya State Paralympics Association u Bah Himalaya M. Shangpliang ula ai ka jingiaroh ia ka jingskhem jingmut bad ia ka jingjop jong kine kiba la ioh ia ka khusnam bad ka pynpaw ia ka jingskhem jingmut ban don ia ka jingiatreilang ban pynkhlain ia ka jingioh ia ki lad bad ki kabu ki bapher.
