Shillong/Tura, Nohprah 05: Ka jingiakhun ban pynduh ia ka jingboi wieh ha ki Khynnah lyngba ka National Dewarming Day kala pynioh dawai ei ia ki Khynnah lyngba ka Sorkar hynrei hangne ha Meghalaya, u dawai wieh bala ai sha ki khynnah la shem ba um dei uba bha (sub standard).
Une u dawai wieh bala ai sha ki Khynnah lyngba ki skul, Anganwadi Centre bad wat ki Hospital ha Jylla Meghalaya, u dei uba kyrteng u Albendazole. Hynrei ka Regional Drug Testing Laboratory ha Guwahati, kaba dei ka drug analyst jong ka Sorkar Jylla, kala pyntip ba une u dawai um dei satia uba bha.
Kat kum ka shithi bala phah da u Drugs Inspector sha ki hospital ka Ri-lum Garo, la bthah ia ki bor khmih ba kin pynsangeh noh ia ka jingpyndih ia une u dawai bad ban weng noh na stock namar kane ka jingshem jong ka test na Assam.
La ong ba u dei une u juh u dwai bala sam wat ha Ri-lum Khasi bad Jaintia Hills ruh kynthup ha Nongbah Shillong.
Kaba lyngngoh pat ka long ba kane ka shithi jong u Drug Inspector kaba la pynshong nongrim kat kum test ka Regional Drug Testing Laboratory, ka dei kaba la phah ha ka 6 tarik Naiwieng 2023, kaba long hadien shibnai bala dep pyndih ia u dawai sha ki Khynnah kum shibynta na ka jingiaid pyndih dawai wieh mynta u snem.
Une u dawai ba don dak jingkylli u dei u – Albendazole tablets bala shna da ka M/S Maxtar BIOGENEICS ha Khasra No.725, jong ka shnong Malku Majra, Nalagarh Road, Baddi district Solan kaba ha Himachal Pradesh.
.){kind=link}