Shillong, Nov 18: Haduh 88 ngut ki Doctor na Meghalaya kila pyndep ia ka jinghikai pyntbit kaba 6 bnai jong ka Training Programme kaba kyrpang ha Tamil Nadu, bad ia kine ki doktor la pynkup burom dang shen.
Kane kadei shi bynta jongka jingiatreilang hapdeng ki ar tylli ki jylla da kaba buh hakhmat ban kyntiew ia ka koit ka khiah ha ka jylla Meghalaya, khamtam ha kaban pynduna ia ka jingiap ki longkmie kiba pun khun bad ki khunlung.
Ha katei ka prokram ai jinghikai la pynleit jingmut ha ki buit treikam kiba kongsan kum ka Comprehensive Emergency Obstetric Care, Life-Saving Anesthetic Techniques bad Ultrasonography.
“Kane ka jingiatreilang kadei da ka jingdon ia ka thong ban pynduna ia ka jingiap ki longkmie kiba punkhun bad ki khunlung hapoh Meghalaya kaban long hapoh ia kaei kaba jia ha ka ri” la ong uwei u heh ophisar.
Ka Chief Minister’s Safe Motherhood Scheme (CM-SMS) kadei kaba phaikhmat ban ai jinghikai na ka bynta ban kyntiew ia ka koit ka khiah jong ki longkmie kiba punkhun bad ki khunlung khamtam eh ha ki shnong kiba don ha nongkyndong. Kane ka jingiatreilang ka pyni ia ka jingshimkhia jong baroh ar tylli ki jylla ban kyntiew ia ka kam ai jinghikai bad ban sam mar kylliang ia ki jingtip, ha kaba ki jaka sumar kiba pawnam ha Tamil Nadu kiba la.kiew shaphrang ha ka rukom ai jingsumar kila don ia ka bynta kaba khraw ha kaban pyniaid shakhmat ia katei ka kam.
La pynmih ia katei ka sienjam lyngba ka jingiasoi iaka Memorandum of Understanding (MoU) ha u snem 2022 hapdeng ka Sorkar Meghalaya bad Tamil Nadu.
Hapoh jong katei ka jingiatehkular, ka Tamil Nadu kan pynbiang ha kaban ai ia ki jinghikai kiba kongsan na ka bynta ki doctor jongka Meghalaya ban pyndap ia ka jingduna bad ban kyntiew ia ki Community Health Centers (CHC) sha ki First Referral Units (FRU).
