Shillong, Iaiong 01: Ka Seng Khasi Kmie, Mawkhar Shillong hynne ka sngi Iewduh, ka la pyndep ia ka lehniam pynkiew ksing, kaba long ka sngi jong ka dak ban pynriew ia ka ksing ka nakra ka bom ka tangmuri, ban pynbna ia ka jingwan poi ka aiom ka shad ka kmen ha ka dur ka shad ainguh katta ka Shad Suk Mynsiem.
Ka Seng Khasi Kmie kala pyntip ba mynta ka kynti, ia kane ka shad ainguh ai dem ia U Blei Trai Kynrad kan long ha ki lai sngi, katta ha ka 13 ka 14 bad ka 15 tarik mynta u bnai Iaiong ha lympung shad ha madan Weiking, Jaiaw, shillong.
Ia ka lehniew pynkiew ksing ka pyndep ha Hall jong ka Seng Khasi Kmie, ha kaba ia ka nguh ka dem ka khnong ka bishar la pyndep ia ka da u dkhot ka Kyhun u riew tymmen riew san ka Seng Khasi Kmie u Rgh Donbokstar Kurkalang.
Kiba la wan ban ia sakhi lang ia kae ka sngi lehniam jong ka pynkiew ksiang ka kynthup naduh u President bad General Secretary ka Seng Khasi Kmie u Rgh O. Pyngrope bad u Rgh Hainess Marbaniang, ryngkat kidkhot ka Jylli Pyrkhat Kam (JPK) bad ki dkhot ka Seng Kynthei, katba ia ka jingialang baroh kawei la pyniaid ia ka da u Rgh D.L Nongbri Vice President Seng Khasi Kmie bad ia ki kyntien ai khublei la ioh na u Rgh Hamar Singh Kharhmar ba dei u Cultural Secretary Seng Khasi Kmie.
Ha kane ka kynti ka kynhun ki duhalia kiba ka Seng Khasi Kmie ka la ibit ia ki ban pyndep ia ka put ka tem ka jong kki ka dei shi kynhun ki samla kiba la dep ban pyntbit bad pynjanai ha baroh ki sur ksing ne skit ka kynthup ia ki khynnah Na Tbian Ki Sur Hara ka kynhun ka La Syrdoh.
Hadien ba la dep ka nguh ka dem ka shat ka khein ka khnong ka bishar da u riew tymmen riew san, la sdang ban tem put ia baroh ki hynniew skit, kum ka dak jong ka jingsdang ka jingpynkhreh pynkhrum ia ka Shad Suk Mynsiem mynta ka snem.
Kumba ka juhlong ka sur ksing ba nyngkong ba latem bad pynsawa ia ka dei ka ‘Ksing Lumpaid’ ka dak jong ka jingialap bad wer ia u kur u kha u marjan marpa najan bad na jngai ba ka sngi ka ia jong ka shad ka kmen ba shi sien shi snem kane ka la wan poi, da kumta ban long kiba la pynkhreh naka bynta ban iashim bynta sha kae ka shad ka kmen.
Shuh shuh ba dei naduh kane ka sngi ba ka Cultural Committee ka Seng Khasi Kmie man la ka janmiet kan pynlong ia ka jinghikai shad ia ki khynnah bad kumjuh ia baroh ki samla kynthei bad shynrang.
