Shillong Nailur 04: Ka NEIGRIHMS hynne ka sngi Nyngkong, kala lah ban pyndep iaka jingleh Surgery ba jynjar bha ia ka kawei ka kynthei kaba 23 snem ka rta kaba na Silchar, Assam da ka kynhun ki Doctor hapoh ka jingialam jong u Professor Ranendra Hajong ryngkat ka jingdonlang ki Doctor kiba kynthup ia Dr Dathiadiam Tongper, Dr K Kamtha N bad Dr Pinky Rabha kiba na ka tnad General Surgery ha ryngkat ka jingai jingiarap jongka Dr Priyanka Dev na ka tnad Anaesthesiology.
U Senior Radiologist Dr Donboklang Lynser ula don bynta ha kaban pynthikna iaka jingdon iaka jingpang.
Kane ka kynthei kala iohbor bad la khmih lynti ba kan sa ioh ban leit noh sha la iing ha kine ki sngi ban wan. Kala leit pynapw iaka jingpang ka jongka ha ka tnad General Surgery, NEIGRIHMS, ba ka don iaka jingpang suh ha ki bynta ba shalor jong ka kpoh (Upper Abdomen) mynta la palat shi snem.
La shem ba kala don iaka jingpang Choledochal Cyst ha u Tube uba pynpoi ia u bile na u liver sha ka Gall Bladder bad ki snier bad kadei kaba don iaka Choledochal Cyst Type 4a.
Kadei ka jingjia kaba kham phylla ba ki Bile kila rung na shapoh bad shabar jong u Liver bad ki nongpang kiba don ia u Choledochal Cysts ki don ia ka jingma kaba khraw ban ioh iaka jingpang Jaundice, jingpang tor bad bampang.
Ka kynhun ki doctor kila leh iaka Magnetic Resonance Cholangiopancreatography naka bynta ban pynkhreh bha iaka jingleh surgery. Ki Surgeon ki don iaka jingkhuslai ba ka snam jong ka nongpang kadei na ka Blood Group ‘B Negative’, kaba dei ka snam kaba kham pher ia kaba lah ban ioh tang 2% ha ka pyrthei baroh kawei bad ka long kaba shem jingeh ban pynbiang iaka snam na ka bynta ban ai kylliang lada jia ba mih kano kano ka jingeh ha ka por ba leh ne ba la pyndep iaka surgery.
“Ngi dap da ka jingkmen ba ka nongpang kala iohbor bad koit bha,” ong u Prof. Hajong bad ka ong, “Ka dei ka jingai jingsumar kaba eh bha, hynrei ka kynhun ka jong ngi kala lah ban weng ia u Cyst bad ban ai iaka iaka jingim kaba thymmai”.
Prof. Noor Topno, Head jong ka Tnad General Surgery, ula ong ba, “Kane ka jingjia ka long kaba pher bha bad nga sngewkmen ba ka kam kaba la leh da ka kynhun jong ki Surgeon bad kiwei kiwei ki riewshemphang ha ka koit ka khiah. Ngi iengskhem ha ka nongrim ban ai iaka jingsumar kaba bha tam ia ki nongpang bad kane ka jingjia kala pynshisha iaka jingtrei met bad mynsiem ka jong ngi”.
U Prof C Daniala, Medical Superintendent, ula ong ba u dap da ka jingsngewtynnad ban tip ba ka nongpang kala iohbor bha hadien ba la dep leh iaka surgery bad ula iaroh iaka jingstad bad jingtbit jong ki Surgeon bad kiwei kiwei kiba donkti ha kaban ai jingsumar.
“Nga sngewkhyllew shi katdei eh ia ka kynhun jong ki doctor” ong u Prof Nalin Mehta, Director jongka NEIGRIHMS bad ka ong, “Kane ka kren sawa jam iaka jinglah jong ki Doctor, Nurse bad ki nongtrei ki jong ngi kiba pyni iaka jingtrei shitrhem ban ai ia ka jingsumar kaba bha tam eh ia ki paidbah jong ka thain shatei lam mihngi”.
