Shillong, Risaw 07: Ka Khasi Jaintia Church Leaders Forum (KJCLF) hynne ka sngi kala pynlong iaka jingbuh jingduwai kyrpang ha KJP English Service Church, Police Bazar, Shillong ban pynkohnguh iaka sorkar jylla ban pynsangeh ia ka ktem khalai Casino bad ban pynduh pyndam iaka Meghalaya Regulation of Gaming Act 2021.
Ka daw kaba la pynlong iaka KJCLF ban pynlong ia kane ka jingbuh jingduwai kyrpang kadei hadien ka jingsakhi ba ka sorkar jylla kam don iaka mon ban pynduh pyndam iaka Ain Khalai ha ka jylla kumba la dawa da kiba bun balang naba ki jingsniew kiba bun jait kin mih.
U President ka KJCLF u Most Revd Dr Purely Lyngdoh ula ong, ka nongrim kaba ka sorkar jylla ka ieng ka long ban ym pynduh pyndam iaka ain khalai bad kane kan pynlong iaka jylla kum ka ktem khalai bad khamtam haba ka jylla ka dap lypa da ki kam bamsap bampong.
“Ha kum kine ki por kum ki Khristan, ka atiar ka jong ngi kadei tang ka jingduwai, kumta, ngi dei ban buh jingduwai ha u Blei khnang ba ki paidbah bad ka jylla baroh kawei kin kyndit bynriew ia kaei kaba kila leh bad ia kaei kaba kin sa leh” ong u Rev Lyngdoh.
Ula pynpaw ruh iaka jingsngewkhia halor ka jingkylla ka mariang ha kaba kala don ka jingshlei um bad ka jingtyrkhong ha kylleng ki jaka, ka jingdon iaki thma bad ka jingiaumsnam, ka jingmih ki jingpang ki bapher kiba la ktah ban pynjot iaki jingim briew.
U President ka KJCLF ula pynpaw ruh iaka jingsngewkhia halor ka jingkawang da ki bomb tear gas ia ki nonghikai kiba don ryngkat bad ki khun ki kti bad ula ong, katei ka jingleh ki pulit ka long ka bym dei bad ka bym iahap satia.
Ula ong, watla baroh ki mad ia ki jingeh bad ki jingsniew hynrei ki briew u Blei ki iai bteng ban shakri ban iaroh bad ban duwai ha u Blei.
Ha kane ka jingbuh jingduwai kyrpang la wan ban iashimbynta da ki nongialam niam na ki niam bad ki balang bapher bapher, u Myntri sorkar barim ka jylla u Bah AL Hek, ki longkmie bad kiwei kiwei..
