Shillong, Risaw 17 : U Myntri ka Development of North Eastern Region (DoNER) Jyotiraditya M Scindia ula pynbna ba ka Sorkar kan pynroi ia ki phra tylli ki jaka shangkai ba khring bha ka Thain Shatei Lam Mihngi kynthup ka Sohra , kum kiwei na ki jaka wankai kiba biang duh ha ka pyrthei (world-class).
Kine ki jaka ki kynthup ia ka Kaziranga, Ziro, Sohra, Thenzawl, Matabari, Kisama, Namchi, bad Moirang bad yn pynroi ia ki lyngba ka Public-Private Partnership (PPP).
“Ki Homestay bad ki eco-tourism models kila nang poi sha ki Jylla bapher bapher, kaba synniang haduh 45% ka jingkiew ha ka ioh ka kot ha ki jaka nongkyndong bad pynioh ia ka kamai jakpoh kaba neh shirta” ong u Scindia ha New Delhi haba kren sha ki lad pathai khubor ha ka sngi Thohdieng.
U Myntri ula pynpaw ia ki jingpyrshang jong ka DoNER ban buh ia ka thain Shatei Lam Mihngi ha ka map ki kam jngohkai ka pyrthei lyngba ka Unfied Brand Northeast Strategy. “Man ki Jylla kila dep ithuh ia la ki jingdon jingem ba kyrpang bad ki jingshem-kum ki ksai muga na Assam, shynrai Lakadong na Meghalaya, Polo na Manipur, jingrep ba khlem dawai na Sikkim bad u Sohtrun na Tripura-ban kyntiew iala ka jong ka jingithuh” ula ong.
“Ula iathuh ba baroh ki Jylla Shatei Lam Mihngi kin sa ioh lynti rel noh hapoh u 2029” ong u Scindia haba bynrap ba ki kam ki dang iaid shaid shaid haba iadei bad ka Kaladan bad ka India-Myanmar-Thailand Highway Project, ka ban plie ia ka jingkhang jong ka khaii ka pateng bad kiwei ki Ri.
Ula ong ba ka thain Shatei Lam Mihngi kala nang paw kum ka engine ba roi ka par ba thymmai jong ka Ri India, da ka jing kynshew pisa ba kot haduh T.4.48 lak klur ha kine ki snem bala leit.
U Scindia ula ong ba ka thain kala iaid ha ka lynti ka jingkylla kaba khraw hapoh ka jinglong nongialam u Myntri Rangbah Duh Narendra Modi.
 Jyotiraditya M Scindia ula pynbna ba ka Sorkar kan pynroi ia ki phra tylli ki jaka shangkai ba khring bha ka Thain Shatei Lam Mihngi kynthup ka Sohra , kum kiwei na ki jaka wankai kiba biang duh ha ka pyrthei (world-class).){kind=link}