Shillong, Jylliew 15 : U Myntri ka Road Transport & Highways Nitin Gadkari, ha ka sngi U Blei ula pynbna ia ka song pisa ba T. 951.21 klur ban shna ia ka surok Tura bypass, ka ban pyniasoh na NH-127B sha NH217.
Haba thoh ha X, u Gadkari ula ong “Ha Meghalaya, ngi la mang ia ka song pisa T.951.27 klur ban shna ia ka Tura bypass kaba pyniasoh na NH-127B sha NH-217 ka ban dei ka surok twolane. Kane ka project kaba jrong 29.03 km ha Tura, ka dei ka surok kaba kongsan bha”.
Ula ong ba ka NH-217 (ba tip mynshuwa ka NH-51) ka dei ka surok kaba pyniasoh ia ka Guwahati sha Dalu, kaba don ha khappud ka Bangladesh bad shakri kum ka Inland custom check-post.
“Kane ka bypass kan sdang najan ka shnong Sanchonggre ha ka surok NH-127B bad kan kut ha ka shnong Jenggitchakgre ha surok NH217. La pynwandur ia ka ban iaid lait na ka lynti iaid jong ka NH-217 kaba iaid lyngba ka pdeng sor jong ka sor Tura, kaba ka surok ka long kaba rit bad ka jingbun ki kali ba iaid lyngba, kala ktah jur ia ka leit ka wan” ong u Myntri.
“Kane ka surok kan iarap ym tang ban pyllait ia ka jingkhapngiah ha sor Turwa hynrei kan kyntiew ruh ia ka jingshngain ki nongleit nongwan” ula bynrap.
