Shillong, K’lyngkot 03 : U Myntri ka Tnad ka Koit ka Khiah Bah Wailadmiki Shylla, ula pynbna ban pynlong da ka Wailadmiki Shylla Youth Festival ba nyngkong eh ha Jowai, ka ban pynleit jingmut ha ka jingpynkup bor ia ki samla ka Jowai Constituency haba pynsaphriang ruh ia ka khubor kaba khlain pyrshah ia u droks bad ka HIV/AIDS ha Jylla.
Ia kane ka festival yn pyniaid da ka National People’s Youth Front (NPYF)-ka Youth Wing jong ka National People’s Party (NPP) kaba synshar ia ka Jylla.
Kane ka festival la buh ban long naduh ka 5 tarik Kyllalyngkot haduh ka 23 tarik Kyllalyngkot. Shibun ki jingpyniakop ialehkai kin don ha kane ka tamasa.
Ka jingialehkai phutbol ki shynrang kan ai ia ka khusnam jop ba T.2 lak sha ka kynhun Champion bad T. 1 lak sha ka runners-up, katba ha ka jingialehkai ki kynthei, ka khusnam jop kan long T.50,000 ia ka kynhun ba jop bad T.20,000 sha ka kynhun ba wan ba-ar.
Kin don ruh kiwei ki jingpyniakop kin kynthup ia ka jingiapynher kot-kudi, marathon, tuf-of-war, Mr& Miss Jowai Constituency bad ka iakop shad bad iakop rwai.
Haba pynbna ia kane ha ka sngi U Blei, u Myntri ula ong “Ka NPYF ka Jowai Block bad ka Mukla Pylun Unit, kum shibynta ban ialehkmen ha kane ka Youth Festival, kin pynlong ia ka marathon ha ka 5 tarik Kyllalyngkot. Ka khusnam jop ia kiba wan nyngkong kan long T.10,000, ba-ar T.5000 bad ba-lai T.3000. Ki nongmareh bala rangbah tam bad ba khynnah tam ruh kin shah pynkup burom da ki khusnam ba kyrpang.
U Myntri u pyntip ba ka bai rung kan dei kaba ioh ei ia baroh haba kyrpad ia ki paidbah ba kin iashimbynta. Ki nongiashimbynta la kyntu ba kin wan ai ia ki jingtip ha madan Jrisalein ha ka por 5:30 baje mynstep. Ka lynti mareh kan long na Iawmusiang, Wahgate, Iengkein Myntdu, Riat Turim, Khliehtyrshi bad Madan Thad Mukhla.
“Ka marathon bad kiwei ki jingialehkai ki dei kiba la pynlong da ka jingthmu ban pynshlur ia ki samla ka thain ba kin ialeh pyrshah ia ka jingdih droks bad ka jingpang HIV/AIDS, ban nang pynkhlain ia ka jingmut ba kongsan jong ka tamasa ha kaban ioh ia ka imlang sahlang kaba shait ba khlain bad kaba lait na u droks” ula bynrap.
