Nongpoh, Lber 29 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong, hynne ka sngi Saitjain, ula pynbna ia ka song pisa ba T. 5 klur ban siang rong noh ia ka surok na Pahamsyiem sha Lum Wyrtoh, u lum ba ju pynlong ia ka lehniam leh rukom jong ka Raid Nongpoh.
U Symbud Myntri Rangbah ula pynbna ia kane ka song pisa ha ka tamasa Shad Sajer bala pynlong hynne ka sngi da ka Raid Nongpoh-ka raid kaba hap hapoh ka jingpeit jingkhmieh jong ka Nongpoh Elaka Sirdarship.
Haba ai jingkren, u Bah Prestone ula ai ka jingiaroh ia ki nongialam ka Raid Nongpoh kiba dang shimkhia ban pynneh pynsah ia ka riti ka dustur, ka lehniam Sajer kumba la buh da u menbarim, khamtam ka jingpynbit pynbiang ban sumar ia u Lum Wyrtoh.
U Bah Prestone ula pyntip ba ia kane ka song pisa la mang ha ka State Financial Budget 2025-26 ban pynurlong ia ka jing angnud bad jingdonkam ia ka surok ba bha ban pyniasoh ia une u Lum lehniam jong ka Raid.
Ha kajuh ka por, ula kyntu ia ki bor ka Raid Nongpoh ba kin thaw noh da kawei ka Society ba kan ioh ia ka jingiarap pisa na ka Ministry of Tourism ka Sorkar India ba kan nang lah ban pynbha shuh shuh ia u Lum Wyrtoh naduh ki jingtei bapher bapher bad kiwei kiwei.
U Bah Linus Lyngdoh, Lyngdoh Raid u la pynpaw, ba ka lehniam Shad Sajer ka dei ka jinglehniam jong ki mynbarim ban ai nguh aidem ia u Blei Nongbuh Nongthaw halor ki jingkyrkhu kyrdoh ia ka rep ka riang, ki soh ki pai, ka Koit ka Khiah bad kiwei kiwei, hynrei hadien ba ki paid ka Raid ki la kylla Khristan kane ka lehniam kam don shuh hynrei ban pynneh pynsah ia ka riti ka dustur, ka kolshor, ka riam ka beit tynrai kumta mynta la pynlong beit satang ia ka Tamasa Shad Sajer khnang ba ka pateng kan nym klet ia la ka tynrai.
La iathuh ruh, ba u Lum Wyrtoh, u dei u lum ba kyrpang ba ju shong ju sah da ki mynbarim bad kiba ju pynlong ia ki jinglehniam leh rukom bad hadien ka jingbun paid bad jingduna um shiteng ki la hiar noh sha them ban shong ban sah ha ka Dong Sajer ban pynlong ruh ia ka lehniam ba la tip kum ka Lehniam Sajer bad hadien ba kito kiba sah ha u tei u Lum ki ju khot ia kiba shapoh hey Nongpoh kumta sa mih ka kyrteng Shnong Nongpoh.
Ha kane ka Tamasa Shad Sajer, la wan ban shimbynta ruh da u MLA ka Nongpoh u Bah Mayralborn Syiem, ka MDC jong ka Nongpoh ka Kong Rona Khymdeit, u Deputy Commissioner ka Ri Bhoi u Abhilash Baranwal, u Bah Linus Lyngdoh, Lyngdoh Raid Nongpoh, ki ophisar sorkar bad kiwei kiwei ki nongialam ka Raid Nongpoh.
 Bah Prestone Tynsong, hynne ka sngi Saitjain, ula pynbna ia ka song pisa ba T. 5 klur ban siang rong noh ia ka surok na Pahamsyiem sha Lum Wyrtoh, u lum ba ju pynlong ia ka lehniam leh rukom jong ka Raid Nongpoh.){kind=link}