Mendipathar, Lber 29 : U National President ka NPP bad Myntri Rangbah ka Jylla Conrad K Sangma, ula pynbna ia ka MP ka Lok Sabha ba mynta Agatha K Sangma kum ka ‘Ambassador ka Jylla Meghalaya’ sha Parliament ban tynruh ia ki mat kiba iadei bad ka roi ka par bad ka jingkiew shaphrang jong ka Jylla.
Haba ialap elekshon haka ktem ka NPP ha North Garo Hills, u Myntri Rangbah ula ong “Baroh ki Jylla ki ju phah ia ki jing tyrwa sha Delhi, kumjuh ruh, ka Meghalaya ka ju leh lang, hynrei kine ki jingtyrwa ki donkam ia kaban buddien, bad ka MP jong ngi Agatha K Sangma ka ju bunkam ban iakren bad ki nongiakam ha Delhi ban pynthikna ba ngin ioh bun eh ka bhah. Kum ka Ambassador ka Meghalaya, kala iakren ia ki jingtyrwa jong ngi (Meghalaya) bad u Myntri Rangbah Duh, ki Myntri Sorkar bad ki Heh Ophisar ha Delhi, ban pynthika ba kin lait noh”.
U Conrad ula ai ka jingiaroh ia ka Agatha halor ka jingpyllait ia ki project ba kot da ki hajar klur ia ka Meghalaya hapoh ka PM-DevINE, PMGSY, PMAY, MGNREGS, bad kiwei kiwei, kiba la syniang sha ki jingkylla kiba paw hapoh ka Jylla.
“Ka long kaba kongsan ba ngi jied ia ki MP, kiba lah ban treikam ha ryngkat bad ka Sorkar Jylla. Ka long kongsan ruh ba ngi don ia ka MP, kaba don ka jingiadei bad iajan ha Delhi. Ka MP ba mynta jong ngi ka dei kaba la shemphang bad kala trei la lai samoi bad nga kyrpad ia ki nongthep vote ba kin ai rai biang sha ka khnang ba kan lah ban bteng ha kaban trei bad ka Jylla ban pyntyllun shaid shaid ia ka roi ka par.
