Shillong, Risaw 30 : U Myntri Rangbah ka Jylla Conrad K Sangma ha ka sngi Palei, ula pynbna ia bun ki prokect kam pynroi bala pyntrei ha ki jaka nongkyndong ha ka prokram CM Connect ba long ha shnong Thangsning, kaba hap hapoh ka Mawkynrew Block, East Khasi Hills.
Ka CM Connect-ka rynsan iakren markhmat hapdeng u Myntri Rangbah bad ki paidbah-ka ai ka lad ia u Myntri Rangbah ban iakynduh bad sngap hi dalade ia ki jingeh u paidbah ha ki shnong ki thaw bad ban pynthikna ba ki policy ka Sorkar ki iaid kat kum ka jingdonkam ha man ki shnong.
Ha ba aijingiakren, ki Nongshongshnong kila pynsngew ia kiba bun ki jingdonkam kum ka jingdonkam ia ka skul Higher Secondary, ka College shnong, ka surok ba kham bha bad ki Jingkieng, ka jingpynheh ia ka Water Supply Scheme bad ka jingpynkha bun ki Anganwadi bad Veterinary Centre.
Haba jubab, u Myntri Rangbah ula pynbna ia katto katne ki project ba kongsan kynthup ka jingmang pisa ba T.13.35 klur ban tei ia ka Jingkieng Jongksha-Thynroit ban pyniasoh khambha ia ka thain, bad ka jingpynshna ia ka madan ialehkai Artificial Turf ka ban don markhap ka Indoor Stadium ha Mawkynrew khnang ban kyntiew ia ki samla ha ki kam ialehkai.
U Conrad ula pynbna ruh ban shna ia 1700 tylli ki Mini Anganwadi Centre ha kylleng ka jylla Meghalaya hapoh kine ki ar snem ban wan ban pynthikna ba ki Khynnah kin ioh ia ki jingbam ba tei ia ka met. Ia mynta, ki Mini Anganwadi Centre kin treikam na ki iing shnong hapoh k alai bnai. Nalor kane, T.60 lak la mang ban shna pynbha ia ki 20 tylli ki Anganwadi Centre na ka skhim ka Jylla.
Halor ka pule puthi, u Myntri Rangbah ula pyntip ba ka Meghalaya kala pynlut palat T.3,500 klur shisnem, ha kaba T.2000 klur la mang sha ka tulop jong ki nonghikai.
“Ban pynjanai ia ka jingtreikam bha bad pynthikna ia ka jingioh mar kumjuh, ka Sorkar kan sa pynbeit thymmai ia ki grant na ka bynta ki skul adhoc bad skul SSA bad ban pynbeit thymmai iaki jingbun kyrdan ki skul khnang ban lah wanrah ia ka jinghikai kaba janai ha manla ki skul” ula ong.
Haba kren halor ka kamai jakpoh ha ki thain nongkyndong, u Conrad ula bthah ia ki Ophisar ba kin pynkhlain ia ka jing shakri ha ka jingsumar ia ki jingri jingduk bad kular ba yn nang pynheh shuh shuh ia ka ka CM FARM+ bad CM SEEDS scheme ban lah ai kham bun ki symbai, ki tiar rep bad ka jingiarap song pisa sha ki nongrep.
Ula kyntu ia ki nongtrei bylla ba kin register ban ioh ia ki labourcard khnang ba kin lah ban ioh ia ki jingmyntoi hapoh ka Labour Cess Fund.
“Ki jingai jingtip jong phi bad ki jingiatreilang kan pynlah ia ngi ban ai ka jingshakri ba kham bha. Ryngkat lang, ngin tei ia ka imlang sahlang kaba khlain bad pynthikna ba man ki longiing kin ioh jingmyntoi na ki kam pynroi ba ngi wanrah” ong u Conrad.
