Shillong, Naiwieng 18 : U Myntri Rangbah ka Jylla Conrad K Sangma hynne ka sngi Nyngkong, ula pynbna ba ka Sorkar Jylla kan kynshew pisa haduh T.4000 klur ban tei ia ki jingtei bapher bapher jong ki kam jngohkai ba kynthup ia ki hotel, homestay bad kiwei kiwei ki jingdonkam, ki ban kyntiew ia ka kam jngohkai ha Jylla.
Ula pynbna ia kane ha ka jingialang plie ia ka Shillong Literary Festival ba 4, kaba la pynlong ha Wards Lake, Shillong. Kane ka tamasa kala iohi ia ka jingwan iashimbynta ki nongthoh kot ba paw bha kum ka Shobhaa De, Vikram Seth-uba ioh ia ka Padma Shri bad kiwei kiwei.
Ka Cherry Blossom Festival ka dang shu kut hapdeng ka jingjop bad bun ki tamasa kin dang ban long ha Jylla ka ban iarap ia ka Jylla ban kyntiew ia ka kam jngohkai.
Haba ban jur ia ka jingiohnong jong kine ki tamasa, u Conrad ula ong ba kine ki tamasa ki dei ki jingkynshew ha ki briew jong ngi hi, ki ban kyntiew ia ki ha ki rukom bapher bapher khamtam lyngba ki kam jngohkai.
Ka thong ba hakhmat eh jong ka Literary Festival ka long ban ai ka rynsan ia ki nongthoh kot ka Meghalaya ba kin pyni pyrthei iala ka sap, ban wanrah ia ka jingiatreilang bad ki nongthoh kot na kylleng ki Jylla ka Ri bad ka pyrthei, bad ban ai mynsiem ia ki samla ba kin sngewtynnad ha ka kam pule kot bad thoh kot.
“Ngi la pynshlur ia ki skul ban iashimbynta, namar kane kan pynlong ia ki khynnah skul ban kwah tip bad ban ioh btin lynti bad saindur ia ki sap ba ki don” bynrap u Conrad.
Haba kren ha ka jingialang, u Conrad ula ban jur ia ka jingpyrshang jong ka Sorkar ban leh eiei halor ki jingeh ba mad da ki samla lyngba ki prokram bapher bapher kum ka Literary Festival. “Ka Meghalaya ka don ia ki nongshongshnong kiba dang khynnah ha ka rta haba ianujor ha ka ri baroh kawei. Ngi la pyrshang ban pynthikna ba ka pule bad ka thok kan dei shibynta na ki jingdonkam ha ka ban kyntiew ia ki samla jong ngi” ula ong.
U Myntri Rangbah ula kren ruh halor ki jingkongsan ka thoh ka tar kum ka lad ban buh jingthoh bad ki kam wadbniah ia ka kolshor ba riewspah jong ka Jylla. Ula kren ruh halor ka CM Scholars Prokram, kaba kyrshania 50 ngut ki research scholar ban buh jingthoh noh ia ki kolshor jong ki Jaidbynriew trai ri ka Jylla.
