Shillong, K’lyngkot 04 : U Myntri Rangbah ka Jylla Conrad K Sangma ula pynbna ha ka sngi Thohdieng, ba ka Sorkar kan sa shna pyndep noh ia ka surok kaba la sahteng la slem jong ka Rongjeng-Mangsang-Adokgre lyngba ka song pisa ka World Bank.
U Conrad ula pynshai ba ka jingslem ban pyndep ia kane ka project ka dei namar ka jinglong kyllain, naba ki Sorkar barim kila pan pyntreikam ia kane ka surok na ki artylli ki skhim kiba hap hapoh ka Ministry of DoNER.
Kane ka project ba T.200 klur kala dei ban dep ha u 2020, hynrei, ka Ministry kala pynkut noh ia kawei na ki skhim namar la aplai ia ka ha ki artylli ki bynta jong kajuh ka Ministry.
“Ka Ministry of DoNER kala shem ba kane ka surok ka dei kaba la aplai ha ki arbynta na ki artylli ki skhim ba iapher jong kajuh ka Ministry bad kumta, ia kawei ka skhim lah hap ban pynsangeh noh” ong u Myntri Rangbah haba jubab ia ki jing kylli na ki paidbah ha ka CM Connect ba long ha ka shnong Memilam, North Garo Hills.
U pyntip ba ha kine ki khyndiat snem bala leit, ka Sorkar kala iatreilang bad ka Ministry of DoNER bad ka Ministry of Finance ban pynthikna ia ka jinglah pyndep noh ia kane ka surok ba kongsan kaba pyniasoh ia ka North Garo Hills bad ka East Garo Hills.
“Ngi la iohpdiang ia ka jingmynjur ban pyndep noh ia ka surok, ka ban sa bei tyngka da ka World Bank” ula bynrap.
Kane ka surok ba 44 km ka jingjrong ka dei u budlum jong ki nongshongshnong ka thain bad kan ai jingmyntoi ia kumba 50000 ngut ki briew na ki artylli ki constituency ka Kharkutta bad Rongjeng.
Katba 22 Km ka surok kana sdang na Rongjeng sha jan ka Nengkhram kala jan dep artad, hynrei bun ki bynta jong ka surok ki dang sahteng bad ba jynjar bha ban leit.
Ia kane ka surok la mang tyngka ha u snem 2017 ba kot haduh T.210 klur, kaba la bei tyngka da ka NLCPR bad ka NEC. Hynrei ka NEC kala weng noh ia kane ka project bad shim noh ia ka song pisa ba T.88 klur ba kala mang, kaba la pynduna ia ka mang tyngka jong ka project sha ka T.123 klur.
Hashuwa ba ka NEC kan weng noh ia ka project, kiba bun ki bynta jong ka surok rim lah kyndang lut khnang ban ioh shna da kaba thymmai.
