Shillong, Jymmang 01 : U Myntri Rangbah ka Jylla Conrad K Sangma hynne ka sngi Nyngkong, ula pynbna ba ka Sorkar India kala dep ai jingmynjur ia ka mining lease jong ki 4 ngut ki nongtih par bad ka jingpynkhreh ia ki kot ki sla ban sdang noh ia ka jingtih dewiong da ka jingstad saian kan dep hapoh ka 60 sngi.
U Conrad ula pynbna ia kane ha ka rynsan ialap elekshon ia u kyrtong ka NPP bah Samlin Malngiang, u ban iakhun ia ka elekshon MLA na Sohiong Constituency, ka ban long ha ka 10 tarik Jymmang.
U Conrad ula pyntip ba ka Sorkar MDA ba ialam da ka NPP kala lah ban pynioh ia ka jingmynjur jong ka Sorkar Pdeng ia ki mining lease jong ki 4 ngut ki nongtih par, ka ba shah ia ka jingtih dewiong da ka jingstad saian ha Jylla.
Ula ban jur ba ka Sorkar NPP kala trei shitom bha ban lah plie noh ia ka jingtih dewiong ha ka Jylla bad kane ka jingmynjur ka dei u soh jong kane ka jingtrei shitom.
U Conrad ula ong ba ka Sorkar MDA kala mudui ia ka mukotduma ha u snem 2019 ban weng noh ia ka hukum khang tih dewiong jong ka NGT bad ka Iingkasahri Supreme Court kala bthah ia ka Sorkar Meghalaya bad India ban pynkhreh ia ki mining plan bad ki lease bapher bapher khnang ban shah noh ia ka jingtih dewiong da ka jingstad saian.
“Khatduh ka sngi kala wan, ngi kmen ban pynbna ba ka Sorkar India kala mynjur ia ki mining lease jong ki 4 ngut ki nongtih par. Ka Sorkar India mynta ka dang pynkhreh bad ka Sorkar Meghalaya ruh ka dang pynkhreh ia ki kot ki sla ban ioh sdang noh ka jingtih dewiong bad tang hapoh ka 60 sngi mynta, ka jingtih dewiong kan sdang ha Jylla” ong u Conrad.
