Pynkup burom ka Jylla ia ki Nongjop ka World Arm Wrestling Championship
Shillong, Nailur 06 : U Myntri Rangbah ka Jylla Conrad K Sangma, ha ka sngi Thohdieng, ula pynbna ba ka Sorkar kan sa pynlong iaka Inter Constituency Football Tournament hapoh ka Jylla ban sei madan ia ka sap ialehkai kiba don ha Jylla.
Ia kane ka lympungialehkai yn sa pynlong hadien ka Meghalaya Games bad kin don haduh 60 tylli ki kynhun ialehkai ki ban mihkhmat na baroh ki Legislative Assembly constituency ka Jylla.
U Myntri Rangbah ula pynbna ia kane ha ka jingialang pynkup burom ia ki nongjop jong ka World Arm Wrestling Championship 2024 ba dang shu kut shen ha Maldova. Ia kane ka jingialang pynkup burom da ka Meghalaya Arm Wrestling Association ha KJP Assembly Hall.
Ula pyntip ruh ba hadien kane ka lympung ialehkai phutbol, yn sa pynlong ruh iaka lympung na ka bynta ki jingialehkai bapher bapher bad kin ioh ia ka jingkyrshan bad ka rynsan ban pynpaw nam ia kine ki jingialehkai.
Haba ai mynsiem ia ki nongialehkai Arm Wrestling, u Conrad ula ong “Ngi tip ba kam long kaba suk ban jop ha ka kyrdan jong ka pyrthei ha kano kano ka kam ïalehkai bad ngi mutdur ba kan donkam ïa ka jingsngewtynnat, ka jingaiti lut, ka jingïaishah bad ka jingtrei shitom bad ngim ju poi pyrkhat ba ngin lah pynmih ia ki champion na ka jylla kaba rit kum ka jong ngi bad kane baroh ka long da ka jingaiei U Blei. Nga sngewkmen ba nga la lah ban iarap ha kano kano ka rukom ha ka liang ka pisa na ka Chief Minister Development Fund”.
U Conrad ula ong ba ka Sorkar ka la kynshew pisa bha ha ki jingtei ia ki madan ialehkai ha kine ki khyndiat snem ba la dep. U la ong ba ki Sports Association bapher bapher ruh kila ioh ia ki jingiarap song pisa ban pynjanai bad pyniaid ia ki jingialehkai jong ki haba bynrap “Ka don ka jingktah jong ka Meghalaya Games ha kaba ka don ka jingpynbha ia ki madan ialehkai kynthup ha ki skul. Ka don ka jingpynkylla dur ia ki madan ialehkai kiba ju pynlong ia ki jingialehkai.”
Kiba la iadonlang ha kane ka jingialang pynkup burom ki kynthup ia u Myntri kam ialehkai Bah Shakliar Warjri, u MDC ka Malki-Laitumkhrah, Director ka Sports, ki nongialamka KSU bad FKJGP Sengkmie lem bad kiwei kiwei.
Ki Nongialehkai kiba la shah pynkup burom ki kynthup ia i samla Senebi Syngki (Bronze medalist ha ka iakhun kti ka diang bad ka min jongkiba 55 kg), Mihsngewbha Rymbai (Silver medalist ha ka iakhun kti ka diang bad ka min jongkiba 80 kg Grandmaster), Starina Jasaiñ (Silver medalist ha ka jingiakhun kti ka diang bad bronze ha ka kti ka mon jong ki 60 kg grandmaster), Hubert Paliar (Bronze medalist ha ka kti ka diang ba 60 kg Para Senior HI category), Margaret Pathaw (Bronze medalist ha kakti ka diang bad Silver medalist ha ka kti ka mon jong ka 60 kg Master Category), Donbor Rumnong uba jop ia ka Mr Asia Pacific Senior Category Gold Medalist bad Overall Men’s Physique 2024 bad ia ka nam First Athlete na Meghalaya ban ioh ia ka PROCARD sha Philippines, Manila City. Johnny Nongrum u dei u nongjop jong ka Middle Weight 6th Bidang Fighting Championship.
Ka kynhun ialehkai ka India kala jop haduh 15 tylli ki takma na ka World Arm Wrestling Championshop ba long ha Moldova ha kaba 9 tylli ki takma ki dei kiba jop da ki nongiakhun kti ka Meghalaya.
