Shillong, Nailar 02 : U Myntri Rangbah ka Jylla Conrad K Sangma ula pynbna ba ka Sorkar Jylla kan sa pynkylla bad pynjanai bha ia ka Mission Football prokram jong ka Jylla bad kan sa pynthymmai ruh ia ki skhim ki ban sa pynbna shen, ban kyntiew ia ka jingialehkai phutbol hapoh ka Jylla.
Kum ka jingpyniar ia ka skhim, u Myntri Rangbah ula pynbna ruh ia ka Local Football Club Support Scheme, ha kaba ki Club bat bit bad ba leit iashimbynta sha ka lympung ialehkai I-League 2 bad ba halor, ki lah ban aplai ia ka grant kaba kot haduh T. 3 klur katba ki club shnong/Intermediate jong ka Jylla ki lah ban aplai ia ka grant ba kot haduh T. 15 lak.
U Myntri Rangbah ka Jylla ula pynbna ia kane haba kren ha ka jingialang plie ia ka Shillong Leg jong ka 133rd Indian Oil Durand Cup, kaba sdang hynne ka sngi Thohdieng ha Jawaharlal Nehu Stadium, Polo.
Naduh ba sdang pyntreikam ia ka State Sports Police ha u 2018, ka tnad Sports & Youth Affairs ka Jylla kala lah ban leh shibun kiei kiei.
Kine ki kynthup ia ka jingtrei ia ki madan ialehkai ha kylleng ka Jylla, ka jingpyntreikam ia ka prokram Talent Identification and Nurturing Scheme kum ka STAR Prokram bad kumjuh ruh ban pynlong ia ki lympung ialehkai ka Jylla, ka Ri bad ki Ri ka pyrthei.
Ka Mission Football, ka skhim ka Jylla ban kyntiew ia ka kam ialehkai phutbol ha Jylla, kala pynthikna ia ka jingtei haduh 111 tylli ki Grassroot Centre ha kylleng ka Jylla, ha kaba jan 8000 ngut ki khynnah kila ioh ia ki jinghikai manla u snem.
Nalor kane, palat 25,000 ngut ki khynnah kila iashimbynta ha ka lympung ialehkai U-12 manla u snem bad ka Subroto Cup State Qualifiers.
Ka jingiatreilang bad ka Meghalaya Football Association kala lah ban pynurlong ia ka Meghalaya State League bad ka Meghalaya Youth League.
Nalor kane, lyngba ka Meghalaya Tourism, ka Sorkar kala shim ruh ia ka jingkyrshan jong ka North East United FC bad ka Shillong Lajong FC ha kine ki arsnem ha ka jingpynlut ba kot T. 10 klur na ka jingbei tyngka. Kane ka jingkynshew ha kane ka jingialehkai, kala sei ruh ia u soh uba thiang.
Ka Sorkar Jylla ha ryngkat ka jingiatreilang bad ka North East United FC, shen kan sa buh ia ka Residential Academy ha Mawkhanu, New Shillong Township.
Ka kynhun ialehkai ka Jylla kala ioh khubor ia ka khusnam Runners-Up ha ka Santos Trophy, 2023, ka kynhun ialehkai U-17 kala khur ia ki takma ha ka phutbol ha ka Khelo India Games bad jop ia ka takma ksiar ha u 2024 ha Tamil Nadu.
U Conrad K Sangma haba kren sha ki lad pathai khubor hadien ka jingialehkai jong ka Durand Cup, ula ong “Ngi kyrpad ia ki nongshongshnong ka Shillong ba kin iamih paidbah ban wan peit ia ki jingialehkai ka Durand Cup”.
“Ngi kmen ban pyndonkam ia kane ka sngi ha kaban sam ia ki jingtip halor ki sienjam bala sdang da ka Sorkar ha ka phutbol bad kiwei ki jingialehkai ha ka Jylla. Ki jingpynlut ha ki jingtei, ki lympung ialehkai bad ki grant kim dei satia ki jongpynlut hynrei ki dei ki jingkynshew ha ki samla jong ngi” ula ong.
