Shillong, Nohprah 04: Kum shi bynta ban plie lad iaki nongrep ban ioh die iala ki mar rep, u Myntri Rangbah ka Jylla u Conrad K Sangma ula pyntip baka Sorkar kan sa pynbun iaki Regulated Markets bad ki Farmers Market ha kylleng ka Jylla.
Ia kane u Myntri Rangbah ula pyntip haba kren sha ki lad pathai khubor hadien ba wai ka 3rd Farmers Parliament kaba la pynlong kum shi bynta ban rakhe iaka sngi kyrpang ki nongrep hapoh ka Jylla.
U Conrad ula pyntip ruh baka Sorkar ka pynshlur iaki nongrep ban thaw daki kynhun ban pyniaid iaki iew katkum ka jingsngew bit ki nongrep naka bynta ban kyntiew iaka ioh ka kot daka ba iadie ia thied.
“Ka Sorkar kan pynbun iaki Farmers Market bad iaki Regulated Market bad ka Sorkar kan ialeh ban nym mushlai ha kum kine ki iew bad kan ailad iaki nongrep ban pyniaid hi ia kum kine ki iew katkum ka jingsngew bit jong ki” la ong u Conrad.
U Conrad ula ong ba ka jingdon ki Farmers Market kan khanglad ia kiwei ki riew shim kabu ban wan tuklar haka iadei iathied ki nongrep iala ki mar bad kane kan long ka jingmyntoi iaki nongrep ka jylla.
Ula iathuh ba ki don ki Farmers Market kiba la treikam bad ki don ki ban sdang treikam shen bad kine ki Farmers Market kin ai lad iaki nongrep, la ki kwah ban die ha kum kine ki iew ne sha kiwei pat ki iew iala ki mar ki mata.
Naka liang ka Myntri ka tnat ka Rep ka Riang ka Kong Ampareen Lyngdoh kala iathuh ba nalor ki Regulated Markets bad ki Farmers Market ka Sorkar jylla ka iarap ruh iaki nongrep ban die ne shalan iaki mar rep sha kiwei pat ki Jylla ka Ri India bad sha bar Ri ruh kum juh.
Ka Kong Ampareen kala ong “Ka tnat lyngba ki skhim bapher bapher ka iarap iaki nongrep ban don ka jingiadei bad ki nongthied mar rep na kylleng ka Ri India bad na shabar Ri bad dang shen ka tnat kala iarap iaki nongrep ban die iaki mar mata haka World Food Mart kaba la long ha Nongbah Delhi”.
