Shillong, Jylliew 06: Kum shi bynta ban rakhe iaka sngi pynneh mariang lane ka ‘World Environment Day’ hynne ka sngi u Myntri Rangbah ka jylla u Conrad K Sangma ula pynbna ban pyllait iaka skhim ‘Chief Minister’s Solar Mission’ naka bynta ban pynshlur iaki paidbah ban pyndonkam daka Solar Units ban pynmih bording elektrik hala iing.
Kane ka jingpyllait ia ka skhim ‘Chief Minister’s Solar Mission’ kadei ruh kum shi bynta ban pyllait naka jingeh kaba ki paidbah ki iakynduh namar ka jingduna bording khamtam kum ha kane ka por ba ka Jylla ka mad ia ka jingtyrkhong slap.
Ia kane u Conrad ula pynbna haka sngi rakhe ‘World Environment Day’ kaba la long haka State Convention Center Shillong, kaba long halor ka phang pdeng ‘Beat Plastic Pollution’ bad ‘Save Shillong’s Rivers’.
Ha kane ka sngi la iohi ruh ka jingwan shim bynta ki Rangbah Shnongs, ki sengbhalang, ki khynnah skul, ki heh sorkar bad kiwei kiwei de.
Haba kren ha kane ka sngi u Conrad ula kyntu ia baroh ban shim ka jingkitkhlieh ban pynneh iaka mei mariang bad ula kyntu ruh ia baroh ban iasnohkti lang bad ka sorkar naka bynta ban iai pynneh iaka mei mariang hapoh ka jylla.
U Conrad ula ong “Wat ju don bynta haka jingeh, don bynta ha kaban weng ia ki jingeh”, bad ula ialap ruh iaki kam baki shnong bad kiwei ki tnat sorkar kila leh naka bynta ban pynneh iaka mei mariang bad ula kyntu ia baroh ban thung uwei u dieng da ka ba iai pyrta ‘One Citizen, One tree’.
U Myntri Rangbah ula pyntip ba iaka Chief Minister’s Solar Mission yn pyllait paidbah haka 7 tarik mynta u bnai bad lyngba kane ka skhim ki longïing kum shi bynta ban wanrah ka jingpahuh bording hapoh ka jylla khamtam ha ki aiom ba kyrduh um.
Naka liang u Chief Secretary ka jylla u bah D.P. Wahlang ula kdew ba ka Meghalaya ka paw nam kum ka jylla ba don iaka wah kaba khuid hynrei ka nongbah Shillong ka don artylli ki wah ba jaboh kata ka Umkhrah bad Umshyrpi.
U bah D.P Wahlang ula iathuh baka sorkar kala don iaka thong ban leh naka bynta ban pynim biang iaka wah Umkhrah bad Umshyrpi daka ba shna iaki kynjam dam barit bad ia kine yn khmih hi da ki Dorbar Shnongs bad ki sengtrei mon sngewbha.
Ha kane ka sngi rakhe Environment Day, kala don ruh ka jingsam khusnam sha ki nongjop haki jingiakp bapher bapher bala pynlong daka tnat bad ha kane ka sngi la pyni ruh iaka phlim Documentary ‘LiFE Mission’, ‘Save Shillong Rivers Campaign’ lem bad kiwei kiwei de.
Naka liang u Sampath Kumar Principal Secretary ka tnat Community & Rural Development u badei ruh u Chief Executive Officer (CEO) ka tnat Meghalaya Basin Development Authority, ula pyntip halor ki kam baka tnat kala shim naka bynta ban iada bad pynneh iaka mei mariang.
U Sampath ula iaroh iaka Payment for Ecosystem Services (PES) bala pyntreikam ha u snem 2022 da u myntri rangbah ka jylla naka bynta ban kyntiew iaka ioh ka kot ki nong shong shnong jong ka jylla.
Ula iathuh ba haduh mynta 17000 hectares ka khlaw la lah ban iada bad ka sorkar ka don ka thong ban pynneh sa haduh 50,000 ka jingdon ki dieng ha khlaw hapoh san snem bad ula ong ba kane ka tehlakam iaka jingshah ktah haka suinbneng.
Nalor kane, ha kane ka sngi rakhe Environment Day kala don ruh ka jingpynmih iaka Natural Resource Management (NRM) Mascots kata Mai Mai, bad ka sim Hill Mynah bad Pakhnai, bad u Clouded Leopard.
