Shillong, Nohprah 02 : U Myntri Rangbah ka Jylla Conrad K Sangma hynne ka sngi Nyngkong, ula pynbna ba ka Jylla kala long kaba la pynkhreh ia ka survey hapoh ka Pradhan Mantru Awaas Ypjana-Gramin (PMAY-G) ban ioh jingkhein ia ka jingdon ki longiing baduk bad ban pynshna ia ki Iing baduk.
Kane ka sienjam ba kongsan ka dei kaba la shim hadien bala dep shna map da ki nongleit survey ia man la ki shnong ki ban dei kiba hakhmat eh ha kaba pynlong ia ka survey ban pynthymmai ia ka thup Awaas+2018- ka ban pynthikna ia ka jingpynrung kyrteng ia baroh ki longiing kiba dei hok ban ioh iing baduk bad ki shnong ruh kumjuh kiba la ieh bad pat leh ha ka survey bala dep.
Kane kala wan hadien ba ka MoRD, Rural Housing Division kala pynjlan ia ka PMAY-G sa san snem tad haduh u snem 2028-29 bad ka Meghalaya kaba la pyndep ban shna ia ki iing kat kum ka thong ba mynshuwa, kan long kawei na ki katto katne ki Jylla kiban pynlong biang ia ka survey.
Naduh ba sdang pyntreikam ia ka PMAY-G ha u snem 2016, ka Meghalaya kala mang haduh 186,283 tylli ki iing, kaba la biang pura kat kum ka thong jong ka survey Awaa+2018. Haduh mynta, 113,158 tylli ki iing la dep ban shna bad kiba sah ki dang don hapdeng ka jingpyntrei. Ka Jylla ka thmu ban pyndep noh ia baroh ki Iing hapoh u Kyllalyngkot 2025.
Ka long kaba kongsan ia baroh ki nongioh bynta ba kin ai ia ki kot ki sla kiba donkam kata ia u aadhaar card, MGNREGA Job Card, Bank Account, Swachh Bharat Mission (SBM) Number, Voter ID bad Caste Certificate lem bad ka Affidavit ba pynbna ba kim don iing.
Ka Housing Mission ka dei kawei na ki san tylli ki thong ka roi ka par ba hakhmat eh bala wanrah da ka Sorkar Meghalaya. Lyngba ka Mission, ka Jylla ka thmu ban iakhun pyrshah ia ka jingduk bad ban buh ia ka thong ka jingkiew shaphrang ha ka jingpynioh iing ha ki jaka nongkyndong bad kiwei kiwei ki jingshakri.
“Ka Sorkar Jylla ka pynthikna biang ia ka jingkut jingmut ban pynioh “Iing ia baroh” haba iakhun ia ka jingduk jingkyrduh. Baroh ki kynhun ba don bynta ki dei ban pyrshang kat kaba lah ha kaban pynthikna ba ym dei ban don mano manor uh ba shah ieh ne iaid lait ha kane ka survey” ong u Myntri Rangbah.
U Myntri Rangbah ula kyntu ia baroh ki Longiing ba dei ban ioh iing bad ki nongioh bynta ia ka PMAY-G ba kin pynkhreh ia ki kot ki slab a donkam bad ban iasnohkti ha ka survey ka ban pynlong. Ula kyntu ia ki Seng ba don ha ki Shnong ki thaw kynthup ki VEC, VDC, VO, SHG ba kin iashimbynta shitrhem ha kane ka kam ban nym ieh shadien iano iano ruh.
 ban ioh jingkhein ia ka jingdon ki longiing baduk bad ban pynshna ia ki Iing baduk.){kind=link}