Shillong, Nohprah 21 : U MDC barim ka Laban-Mawprem u Bah Ricky Shullai, ha ka sngi Thohdieng, u la pynbna ban mih aireng ha ka ilekshon MDC ka ban long ha ka 21 tarik Rymphang, 2025 kum u kyrtong shimet.
U Bah Ricky Shullai u la shim ia kane ka rai ha ka jingialang kaba u la lum kaba la wan iashimbynta da ki paidbah na kylleng ki shnong ba hap hapoh ka Laban-Mawprem constituency.
Ki katto katne ki nongkren ki la pynpaw ka jingkmen halor kane ka rai bad ong ruh ba ka jingmih shakhmat jong ki, ka dei lyngba ki kam kiba u Bah Ricky u la trei na ka bynta ka bit ka biang jong ki shnong ki thaw tang ha ki ar snem eiei ba u la long MDC.
Shuh shuh ki la pynpaw ruh ka jingsngewnguh ia u Bah Ricky ba watla u la rem ha ka ilekshon MDC kaba la dep hynrei um shym la iehnoh bad ban iai don ryngkat bad u paidbah ha ka khia ka shon ne ha kiwei kiba bun ki kam.
