Shillong, Nailur 07: Ka National People’s Party (NPP) kan pdiang burom ia u MLA barim ka Mawsynram constituency bah H.M Shangpliang ha ka 13 tarik u Nailur ha ryngkat bad ki nongkyrshan.
Lah ban kdew ba u MLA barim ka Mawsynram constituency u bah H.M Shangpliang haka 6 tarik mynta u bnai ula mih noh na ka Bharatiya Janata Party (BJP) ha ryngkat ka jingkynnoh ba ka don ka jingleh shilliang na u President ka BJP Meghalaya bah Ernest Mawrie.
Kane ka jingpdiang burom ia u bah Shangpliang bad iaki nongkyrshan kan long hapoh ka ophis treikam jong ka NPP ha Lachumiere Shillong.
Haba kren sha ki lad pathai khubor u bah Shangpliang ula ong “Nga la rung shaka NPP khlem kano kano ka kyndon hynrei nga la rung sha kane ka Party ban ioh ki lad ban shakri iaki paidbah ka thain Mawsynram bad ka jylla baroh kawei”.
U bah Shangpliang ula ong ba ka jingrung jong u shaka BJP kadei namar ka jingburom bad ka jingshah niah haka Party kaba ialam hi da u myntri rangbah duh ka ri India u Narendra Modi.
Ula ong ba watla ula shah rem noh haka ilekshon MLA hynrei u dang iai neh bad ka BJP namar u kwah ban kyntiew iaka Party khamtam haki thain kyndong.
“Nga la rah shibun ki buit kumno ban kyntiew iaka BJP hapoh ka jylla hynrei naka liang u president ka Meghalaya BJP u bah Ernest Mawrie haduh mynta u khlem la treh satia ban shim iaki sienjam ban kyntiew iaka Party ha baroh kawei ka jylla” la ong u bah Shangpliang.
Haba kylli halor ka jingkynnoh leh shilliang ne pynhun tang iaki bahaïing, u bah Shangpliang ula ong “Ka jingioh president Mawsynram Mandal u bahaïing kadei namar hashuwa ban rung shaka BJP kil ladei lypa ki nongialam ba rangbah bad ia kane ka rai ruh la soi da u president ka Meghalaya BJP”.
“Namar ka jingjur ka jingle shilliang, ka jingpynhun iaki bahaïing bad ka jingjur palat ka jingiashrut hapoh ka Party, nga la shim iaka rai ban mih noh naka BJP ban ioh shuh shuh ki lad ban shakri iaki paidbah” ula ong.
Haba kylli halor ka jingmih khubor ba un iakhun iaka MP Lok Sabha ilekshon 2024, u bah Shangpliang ula ong ba u iasoh shaka NPP khlem kano kano ka kyndon bad un shaniah hi haka Party ban shim rai, la u ibit ne em ban iakhun iaka MP Lok Sabha ilekshon.
