Shillong Naitung 17: U MLA ba marwei ka KHNAM na North Shillong Bah Adelbert Nongrum, hynne ka sngi U Blei ula pynbna ia ka rai ban leit pyniasoh noh sha kiwei pat ki seng sain pyrthei hashuwa ka elekshon MLA-2023 ban long ha Jylla.
“Nga la pynkhreh ban iakhun biang ia ka elekshon na kawei pat ka Party” ong u Bah Adelbert ha ka kyrwoh khubor.
Haba pynpaw ba kam don satia ka jingmut na u ban shet kylla ia ka KHNAM, ula ong “Hynrei ki briew ki tip ia kaei kaba jia hapoh ka KHNAM bad ka jinglong jingman ka dawa ia nga ban mih noh na kane ka seng sain pyrthei”.
Hynrei u Bah Adelbert ula kular ba un dang iai bteng ha kaban trei ia ki kam ban pynurlong ia kaei kaba ula kular sha ki paidbah ka North Shillong.
U Bah Adelbert u dei uwei na ki nongseng jong ka KHNAM. Ula shah jied kum u MDC haduh arsien ha u snem 2009 bad 2014. Ula shah rem ha ka elekshon MLA 2013 bad jop ha ka elekshon 2018.
