Shillong, May 30: Ka Indian Meteorological Department (IMD) kala pynbna “Red Alert’ ha kiba bun ki District ka Jylla Meghalaya bad pyntip ba kan don ka jingther u lapbah lapsan ha kylleng ki jaka namar ka jingthut ka suinbneng ha Bangladesh.
Kat kum ka special weather bulletin ka IMD ba pynmih hynne ka sngi por 1 baje janmiet, kane ka jingkylla ka suinbneng kaba jngai tang kumba 260 Km shaphang Sepngi-Shathie Sepngi ka Shillong, kala iaid shaphang Mihngi-Lam Mhngi ha ka jingstad ba 18 Km/h bad la khmih lynti ba kan wan poi ha ka thain hapoh ka 12 kynta.
Weather Alerts:
May 30 (Day 1)
Ka jingther u slap kan jia ha East Khasi Hills, South West Khasi Hills, East Jaintia Hills, bad West Jaintia Hills.
Lah antad ruh ba kan don ka jingther u lapbah ha West Khasi Hills, Eastern West Khasi Hills, Ri-Bhoi, bad baroh kawei ka ri-lum Garo.
La khmih lynti ia ka lyer kaba beh haduh 40-50 kmh bad kot ruh ia ka 60kmh ha kiba bun ki jaka jong kine ki district.
May 31 – June 3 (Day 2–5)
Baroh kawei ka Jylla kan don hapdeng ka jingther u slap bad lapbah ha baroh shi taiew ha ryngkat u pyrthat bad ka lyer kaba beh haduh 30-40 kmh ha kiba bun ki district.
Ki jingma na ka jingshlei um:
Ka khubor ka IMD ka maham ruh ban don ka jingshlei um kaba shyrkhei ha kiba bun ki district ba kynthup ha East bad West Jaintia Hills, East bad West Khasi Hills, Ri-Bhoi, bad baroh kawei ka Ri-lum Garo.
Ki jingbthah ban leh eiei:
Ka IMD kala buh ia kane ka jingmaham ha ka kyrdan ba hakhlieh duh ba dei ban leh eiei ia ka. La bthah ia ki nongshong shnong ha kine ki jaka ba buh jingmaham ba kin shong ha iing, kiar na ka jingleit iaid sha ki rud wah bad bud ia ki jingbthah ki Disaster Management Authority.
