Shillong, Jylliew 22 : Ka Sorkar Jylla kala pynbna mynta ia ka thain Khyndai Lad, Police Bazaar kum ka ‘No Vending Zone’ ne ka jaka bym shah shuh ban iashong dukan madan, haba buh por ban pynkynriah noh ia baroh ki dukan madan na ka thain hapoh ka 22 tarik Naitung.
Ia kane la pynbna da ka Shillong Municipal Board (SMB), kaba la pynmih ia ka jingbthah ia barohki nongshong dukan madan ha ka thain Khyndai Lad, ba yn sa pynkynriah noh ia ki kat kum ka Meghalaya Street Vendors (Protection of Livelihood and Regulation of Street Vendors) Scheme, 2023.
Kum shi bynta na ka jingpyrshang ban pynitynnad ia ki jaka pdeng ka sor kum ka Khyndai Lad, ka Sorkar ka don jingthmu ban pynkynriah ia baroh ki nongshong dukan madan sha ka jaka shong dukan madan bala ithuh da ka Sorkar (Vending Zone).
Watla ki jingshna ia ki dukan ha ki katto katne ki Vending Zone kila dep, ka jingpyntreikam ia ka Street Vendors Act kala mad ia ka jingtynjuh, kynthup ka jingpyrshah na ki nongshong dukan madan kiba pynpaw ba kam shym la don ka jingia syllok kaba bniah bad ka jingbym long shai ha ka jingpynkynriah ia ki briew ba dei hok ban ioh shong dukan madan.
Kat kum ka jingpynbna, ka Town Vending Committee kala dep sam ia ki Certificate of Vending (CoV) sha ki nongshong dukan madan kiba dei hok ban ioh dukan ha ki Vending Zone, hapdeng ka 2 tarik Jylliew haduh ka 19 tarik Jylliew.
Hadien kane, ka Sorkar kala ithuh ia ka mala kaba hakhlieh duh jong ka MUDA complex kum ka Vending Zone, kaba bujli noh ia ka jingai jingbit ban iashong dukan madan ha surok.
La bthah ia baroh ki nongshong dukan madan kiba don ia ki COV ba kin kynriah noh ia ki dukan jong ki hapoh ka 22 tarik Naitung 2025. Ia ki jaka ba dang sah jong ka Khyndai Lad la pynbna noh mynta kum ki No Vending Zone.
Ki nongshong dukan madan ki bym don ia ki COV kin hap ban pyllait noh ia ki jaka ba ki shong hapoh ka lai sngi bala pynmih ia ka jingpynbna, ban bud ia kane ka jingpyrrkhing ba thymmai.
Ia kane ka jingpynbna la soi lang da u Chairperson ka Town Vending Committee bad u Chief Executive Officer ka Shillong Municipal Board.
