Shillong, Iaiong 17 : Ka tnad Jngohkai Pyrthei ha ryngkat ka jingiatreilang bad ka Meghalayan Age Ltd kin pynlong ia ka ‘Culinary Cascade 2025’, ka tamasa shet jingshet kaba lai sngi lynter, ban rakhe ia ka rukom shet jingshet bad ka kolshor ba riewspah jong ka jylla ha Nan Polok, Shillong naduh ka 1 haduh 3 tarik u Jymmang 2025 naduh ka por 12 baje mynsngi haduh 8 baje mynmiet.
Ka ‘Culinary Cascade’ kam dei tang ka tamasa shet jingshet—ka dei ka jingïakhih ban pynïasoh biang ïa ki jaitbynriew bad ki tynrai jong ki, ban pyndap ïa ki jingïapher hapdeng ki pateng, bad ban burom ïa ka jingstad tynrai.
Da kaba pynleit jingmut ha ka jingstad tynrai, ka jingpynneh pynsah, bad ka jingpynroi ïa ka jingïadei kaba jan bad ki nongrep trai ri ka tamasa kan pyninam ïa ki jingbam, ki khana, bad ki rukom leh tynrai kiba pynwan dur ïa ka jinglong kyrpang jong ka Meghalaya. Ka ‘Culinary Cascade’ kam ithuh tang ïa ki bynta jong ka thaiñ hynrei kan shim ruh ïa ka jingai mynsiem na ka rukom shet iaki jingbam jong ka pyrthei ka ban lam sha ka rukom shet ba iakhleh bad na ka Jylla.
Kane ka tamasa shet jingshet kan pynpaw bad pyni ïa ki mar rep ba pynmih da ki nongrep , ki jingshoh (spice) ba la thung ha ka thaiñ, bad u slasha bad kophi ba thung hi. Ha kane ka tamasa kan don ruh ka jingpyni nuksa ia ki jingdih ba shna hi ha ka Jylla ha ryngkat bad ki jingbam tynrai ki Khasi, Jaintia bad Garo. Kan don ruh ka jingpyni kyrpang ia ka documentary ha kane ka tamasa ka ban batai kaei kane ka “Culinary Cascade”.
Ha kane ka tamsa kan don ruh ki jingpyni ia ka rukom shet jingshet da ki nongshet jingshet ba pawnam bad ki paralok na ki culinary institute. Ki nongwan kin ïoh jinghikai na ki briew halor ka rukom thad doh, ka buit ban shet ia ki jingbam bapher bapher, bad kin ïashim bynta ha ki jingïakren bad ki nongshet jingbam, ki professor bad ki nongthoh shaphang ki jingbam. Yn pyni paidbah ruh ia ki tiar ki tar, ki khiew shet bad kiwei kiwei.
U Jason White, u nongshet jingshet ba hakhlieh duh jong ka Restaurant Noma kaba la ioh ia ka Michelin Star bad u nong thoh jingthoh halor ki jingbam, un iadonlang ha kane ka tamasa.
