Shillong Nailur 15: Ka National Career Service Centre for Differently Abled, Shillong kala pynbna ban sdang ia ka jingai jinghikai ha ka Computer Application bad ka jingmaramot ia ki mar elektrik bad kiwei kiwei ki tiar ba pyndonkam ha ki iing.
Kane ka jingai jinghikai kadei kaba ym donkam ban siew eiei, na ka bynta kito kiba don jingduna ha ki dkhot met kiba don jingduna ha ki shyieng, kiba tlot ka bor iohi, ka bor iohsngew, kiba kham suki ka bor pyrkhat, kiba bun ki jait jingduna dkhot met bad kito kiba la jem na ka jingpang niangthohlieh.
Kane ka prokram ai jinghikai ka dei kaba naduh hynriew bnai haduh shi snem bad ha kane ka por ba dang ai jinghikai, kiba shah hikai kin ioh ka stipend kaba T. 2,500 ha ka shi bnai.
Kiba kwah ban iashimbynta ha kane ka prokram ki dei ban ai ka bio-data ryngkat kiwei kiwei ki kot ki sla kum ka jingpynshisha ia ka kyrdan pule jong ki, ka jingpynshisha ba ki don jingduna ha ki dkhot met, Aadhar card, caste certificate, ka dur passport bad ki jingtip shaphang ki bank account jong ki sha ka ophis kaba don ha Keating Road shuwa lane haduh ka 30 tarik u Nailur 2023.
Ka National Career Service Centre for Differently Abled kadei ka ophis hapoh ka Directorate General of Employment (DGE), hapoh ka tnat Labour & Employment, Sorkar India bad ka trei na ka bynta ka bha ka miat jong ki briew kiba don jingduna ha ki dkhot met lyngba ki jingiasyllok, ki jingpeit, ki jingai jinghikai khnang ban ioh lad kamai jakpoh, bad ruh kiwei kiwei ki kam khnang ban kyntiew ia ki.
