Shillong, Lber 10: Ka Myntri kaba khmih iaka rep ka riang Kong Ampareen Lyngdoh hynne ka sngi Nyngkong kala pyntip ba ki don ki skhim sorkar kiba la iaid shakhmat bad ki ban dang sdang pyntreikam ban pynbiang ia ki sboh dawai bad ia ki symbai bala ai subsidy, sha ka nongrep ka West Garo Hills District.
Haba jubab ha ka iing dorbar thawain, ka Kong Ampareen Lyngdoh kala ong ba kiba don mynta kidei tang ki bynta kiba iadei bad ka rep ka riang kiba kynthup ia ki mar rep ba seisoh bha, ki symbai kba bad riewhadem, ki tiar ban kynshait ia ki jingthung, ki tiar ki tar ban ialeh pyrshah ia ki khniang ha kaba ki nongrep ki lah ban shim ia kine ki tiar da ka subsidy na ki Nongtrei jong ka Tnad kiba don ha kylleng ki jaka.
Kala pyntip ruh ba ka sorkar ka dang trei ban pynbha ia ka jingpynpoi ia ka um ban kyrshan ia ki nongrep khamtam eh ha ka por ba tyrkhong.
Ka tnad kala ai 21 tylli ki jingkynshait um bad 140 tylli ki Pump ha ki 7 tylli ki Block jongka West Garo Hills sha ki 140 ngut ki nongrep hapoh jongka per drop mre crop (PDMC) scheme, kala ong.
Hapoh jong ka FOCUS scheme, ka Kong Ampareen kala ong ba ki nongrep kiba dei na ka kynhun jong ki nongpynmih ki ioh iaka jingkyrshan pisa kaba kot T.5000 uwei pa uwei u nongrep ban kyrshan ia ki kam rep kam riang bad ban kyntiew ia ka jingpynmih bun.
Ka Pradhan Mantri Kisan Samman Nidhi Yojana (PM-KISAN) ka ai jingkyrshan pisa kaba T.6000 shi snem ia ki nongrep kiba don ia la ka jaka rep bad la ai ia katei ka pisa ha ki 3 bynta bad kala ong lyngba ka Pradhan Mantri Fasal Bima Yojana (PMFBY) la ai Insurance ia ki jingthung na ka jingshah pynjulor ha ka mei mariang. Ka sorkar jylla ruh kala iarap siew lang ban pynsting iaka jingkit jong ki nongrep.
Ha kaba iadei bad ka Kisan Credit Card (KCC), ka myntri kala ong ba ka Interest Subvention Scheme jongka KCC ka ai ia ka jingshngain ia ki riewshimet kiba shim thikna na ki nongshim ram kiba dei ki nongrep. Kine ki nongrep ruh ki ioh 4% ia ka sut na ka sorkar jylla nalor ka jingioh ia ka 3 % na ka sorkar India.
Kala pyntip shuh shuh ba ka District Agriculture Office ka ai iaka sboh kaba khlem ai dawai ha ka dor subsidy, ki Bio Fertilizer, Bio Pesticides bad ka jingai jinghikai ia ki nongrep kiba khlem khlem da pyndonkam ia ki dawai ha ki jingthung ne organic farming.
Ki District Horticulture Office ki pyntreikam ruh ia ka Mission Organic Value Chain Development for North Eastern Region (MOVCD-NER) Scheme bad ka Meghalaya Organic Mission ha West Garo Hills ha kaba 10 tylli ki Farmer Producer Organization (FPO) kila shim iaka syrnod ‘Organic’ na ka bynta ka jaka rep kaba 4,500 Hektar bad kane ka dang iaid shakhmat, kala iathuh.
