Shillong, Naitung 7: Ka Meghalaya State Olympic Association (MSOA) bad ka Directorate of Sports & Youth Affairs ryngkat ka Meghalaya Athletics Association (MAA) kila pynbna ban pynlong ia ka 4th Sohra International Half Marathon, ha ka 27 tarik u Nailur 2025.
Kane ka jingiakob mareh kadei kaba la ioh ia ka jingithuh na ka World Athletics bad ka Athletics Federation of India (AFI), kane ka jingiakob ka iai bteng ban kyntiew ia ka mynsiem jongka jingiakhun bad ia ka koit ka khiah ha kylleng ka jylla.
Haba kren sha ki nongthoh khubor, u DD Shira Director ka Sports & Youth Affairs, Bah John F Kharshiing u Working President ka MSOA bad u Bah Finely Pariat, General Secretary, MSOA, kila wer ia baroh ki nongialehkai ban ia ki riewieid ialehkai kiba na Meghalaya bad kiba na shabar ban iashimbynta ha kane ka jingiakob kaba donnam.
U D.D. Shira ula pynbna ba “Ka 4th Sohra International Half Marathon Event kan long ha ka 27 tarik u Nailur 2025. Ka Tnad Sports and Youth Affairs kan iatreilang bad ki nongialam shnong bad ki Dorbar Shnong ka Sohra ban pynthikna ba kane ka jingiakob kan long kaba jop”. Ula ai ruh ka jingiaroh ia ka ophis treikam jong ka Sohra Sub-Division, ki pulit bad kiwei kiwei ki tnad na ka bynta ka jingai jingkyrshan.
U Bah John F Kharshiing ula kyntu ia ki paidbah ka Meghalaya bad kiba nabar ba kin ai kyrteng hapoh ka 10 tarik u Nailur.
U Bah Finely Pariat ula ong ba ha u snem bala dep, kila don haduh 7000 ngut kiba la wan iashimbynta ha kane ka marathon bad mynta u snem ki khmih lynti ba ki nongiashimbynta kin kot sha ka 10,000 ngut bad ula pynshlur ia ki nongshong shnong ka jylla ba kin wan iashimbynta.
Ula iathuh ba kane ka jingiakob kadei ruh ka lad ban kyntiew ia ka Sohra kum ka jaka jngohkai kaba kongsan bad ula ong ba ka pisa baroh ban ai khusnam ha kane ka jingiakob kan kot sha ka T.15.50 Lak.
Ka jinglut jingsep baroh kaba kynthup ia ka technical bad ka jaka sah, ka bam bad kiwei kiwei kan kot sha ka T.2 Klur bad ula ong ba kane ka Marathon kadei kaba baroh ki lah ban iashimbynta bad kadei ruh kaba ai ia ka khusnam pisa kaba heh.
Ha ka marathon kin don ruh kiba bun ki jingiakob na ka bynta ki kynthei bad shynrang, kynthup ia ka 21K Elite Open and Meghalayan (na ka bynta kiba la 18 snem shaneng), ka 10K Open Race (ha ki rta ki bapher naduh 18 haduh 59 snem), bad ka jingiamareh kaba pawnam ka 5K ‘Run for Fun’. Yn ai khusnam kyrpang ia ki nongmareh kiba la palat ia ka 50 snem ka rta kiba iashimbynta ha ka 21K race, kaba pyni ba kane ka jingiakob ka pynshlur ia ka jingiashimbynta naduh ki rta ba dang rit haduh kiba la heh.
Kane ka jingmareh kan sdang na e Laitsohpliah kaba don 6 Km shakhmat jong ka jingkieng Mawkdok bad yn pynkut ha Mawsmai (Nohsngithiang Falls viewpoint). Ban pynthikna ba kane ka jingiakob kan long kaba iaid beit, ki surok kiban poi sha Sohra yn khang naduh ka por 6 baje mynstep haduh 10 baje mynstep ha ka sngi ba pynlong ia ka jingiakob. Nalor kane la pynkhreh ruh ia ki kali ban kit ia ki nongiashimbynta bad ia ki nongtrei ban leit ban wan na Shillong sha Sohra. Ki nongmareh kin hap ban mih na Shillong ha ka por 3 baje mynstep ban leit sha Laitsohphliah, ka jaka ban sdang ka jingiakob mareh.
Ka jingpynrung kyrteng ne Registration kan long online bad lah ruh ban leit register dalade ha ka ophis jongka MSOA Office ha JN Stadium, Shillong bad ha Sohra Shop hajan ka Petrol Pump kaba don ha Lad Thanad.
Ka bai rung ka long T.1,000 ha ka 21K bad T.200 ha baroh ki 10K bad T. 50 ha ka 5K Run for Fun. Ka tarik kaba khatduh ban pdiang ia ka jingpynrung kyrteng kan dei ha ka 10 tarik u Nailur 2025.
Ia ki T-shirts bad ki Bib Numbers na ka bynta ki nongiashimbynta ha ka 21K bad 10K yn sam ha ka 25 tarik bad 26 tarik u Nailur ha JN Stadium, Polo Grounds.
Ki nongiashimbynta ha ka 5K Run for Fun na Shillong bad kiwei kiwei ki jaka kiba marajan ki lah ban leit shim ia ki tiar ne Kits ha ka 26 tarik u Nailur na katei kajuh ka jaka, katba kito kiba na Sohra ki lah ban shim hi na Sohra ha katei kajuh hi ka sngi.
