Shillong, Naiwieng 22 : Ka Khasi Students’ Union (KSU) hynne ka sngi ba-ar kala rai ban pynsdang ia ka jingiakhih da kaba rah lama iong lashai ka sngi Balang ha Ri-lum Khasi Jaintia namar ka jingiai bteng ka jingshah thombor jong ki khun u Hynniewtrep kiba shong ba sah ha ki shnong khappud bad ka Assam.
Ka KSU kala shim ia kane ka rai ha ka jingialang jong ka Central Executive Committee (CEC) kaba iakynduh kyrkieh hynne ka sngi namar ka jingjia ha Mukroh ha kaba san ngut ki paid Khasi ba lui lui kila shah siat iap ha ki Pulit ka Assam.
Kat kum ka kyrwoh bala phah da u General Secretary ka KSU samla Donald V Thabah, la ong ba ka KSU kala rai ban pynlong ia shibun ki jingiakhih nangne shakhmat bad lashai ka sngi kan sdang da ka Blag Flag Day ha kylleng ka Bri u Hynniewtrep shuwa ban pynbna ia kiwei pat ki jingiakhih ba hadien.
Kat kum ka jingong jong u, kane ka jingiakhih ka long halor kiba bun ki mat jingdawa kiba ka Sorkar Jylla ka dei ban pynyrlong noh shuwa ban sdang ia ka jingiakhih ba kham heh.
U Samla Donald ula iathuh ba ka CEC kala shim ia bun tylli ki rai ban dawa pyntreikam ia ka Sorkar ba kynthup ia ka jingdawa ba ka jingiapynbeit pud ka dei ban pyniaid noh ha ka jingkhmih bad jingpynbeit lang jong ka Sorkar Pdeng.
Ka KSU kala dawa ia ka Sorkar ban pynthikna ba baroh ki shnong Khasi bad ki jaka ba hap ha Hima, Raid, ki Elaka Khasi ki dei ban hap beit hapoh u pud u sam ka Meghalaya kat kum ka jingdawa Hill State lem kumta ka kan pynpulom ia ka jingthmu jong ka Hill State.
Ka KSU kala dawa ruh ban weng noh mardor ia ki len jong ki Pulit Assam ne kino kino ki Tnad Assam na ki Shnong Khasi kiba don ha khappud. Kala dawa ruh ban kem bad pynshitom ia ki runar na Assam kiba donkti ban synreit kuli pathar ia ki paidbah ha Mukroh bad ban ai jingiarap ia ki longiing jong kito kiba la khlad bad ba mynsaw na katei ka jingjia.
Namar ka jingiai bteng ki kam thombor jong ki Pulit Assam ha ki shnong khappud, ka KSU kala dawa ia ka Sorkar ba ka dei ban seng ia ki Police Station ha manla ki jaka khappud khamtam ha ki jaka ba kham don ka jingiakynad. Kala daw aba dei ban pynurlong noh ia ka jingdawa bala slem jong ka Seng ban buh ia ka Police Outpost ha Barato/Mukroh bad ban phah ia ki Pulit ba kin leit ai jingiada ban ban pynher krad noh ia ki Pulit Assam na ka thain.
U Samla Donald u pyntip ba ka KSU kala dep phah sha Mukroh ia ki Nongialam ka CEC ba kynthup ia u samla Biangbor L Paliar (VP), samla Sonstar Nongkhlaw, samla Barikular Nongsiej, Samla Iashan Mukhim, samla Shiningstar Kharbihkhiew bad kiwei kiwei ki dkhot kiba na West Jaintia Hills bad East Jaintia Hills ban don ryngkat lem bad ki nongshong shnong ka Mukroh.
Ka KSU kala phah ruh ia ka kyrwoh sngewlem sha ki bahaiing jong ki 5 ngut ki Khasi kiba la iap na kane ka jingjia bad sha baroh ki nongshongshnong ka Mukroh.
Ha kajuh ka por, ka seng Federation of Khasi Jaintia & Garo People (FKJGP) kala tyrwa ia ka jingiasnohkti lang bad ka KSU halor kine ki jingdawa bad kumjuh ruh ha ka jingiakhih Blag Flag Day ka ban long lashai ka sngi.
U General Secretary ka FKJGP Bah Eldie Newton Lyngdoh ula dawa ia ka Sorkar Jylla ba ka dei ban phah mardor ia ki Pulit ka Jylla ba kin leit thwet bad kem ia ki briew kiba ther kuli ia ki paidbah ha Mukroh kumba ka phah thwet bad kem ia ki Nongialam Sengbhalang wat ha ka miet ka iong.
