Shillong, Jylliew 25 : Ka Khasi Students Union (KSU) ha ka sngi Saitjain kala pynbna da ka thma pyrshah ia u droks haba kyntu ia ka Sorkar Jylla ban shim da ki buit ba thymmai ha kaban rat dyngkhong ia une u jingdih pynbuaid na ka imlang sahlang.
Haba kren ha ka jingialang shimsmai jong ka EC ba thymmai, u President ka KSU Lambokstar Marngar ula ong “Ngi la rai ban pynlong noh da ka thma pyrshah ia u droks da kaba iatreilang bad ki Dorbar Shnong lem bad ki skul”.
“Ngi dawa ruh iaka Sorkar Jylla ban shim da ki buit thymmai haba tehlakam ia kane ka jingeh khnang ban lah rat dyngkhong naduh tynrai ia ka jingdie droks ha ka imlang sahlang” ula bynrap.
Hadien kane, haba iakren bad ki nongthoh khubor, u Bah Lambok ula ong ba ka jingdie bad jingdih droks ka dei ka jingma ia ka lawei jong ki samla bad ki paid riewlum trai ri ka Jylla.
“Ka jingwan rung u droks hapoh ka Jylla ka dei ka jinghiar thma ba jar jar ia ka Jaidbynriew jong ngi da kaba pyntroin ia ka lawei jong ngi, ki ba dei ki samla. Ngi ka iohi ia ki briew kiba shah kem naki thain kum ka Happy Valley bad ki briew ba nabar ka Jylla” ula ong.
“Namar kata, ngin iatreilang bad ki Dorbar Shnong ban rat dyngkhong ia ka jingdie bad jingdih droks namar ban leh marwei hi ka long kaba eh. Ngim dei ban ibein iaki nongdih droks hynrei ka imlang sahlang ka hap ban khmih ia ki kum kito kiba donkam ia ka jingiarap jong ngi” ula bynrap.
Haba kylli, une u Nongialam ka KSU ula ong ba kala donkam ban don ka mon jong ka Sorkar Jylla ban wanrah ia ki sienjam ba thymmai ha kaban iada ki briew uniform (Pulit) ba kin don ka jingiadei bad ki nongkhaii droks.
“Ha ki snem bala leit noh, ngi la shem ba ki Pulit kila iadonkti lang ha ka jingkhaii droks hynrei ngim ong ba baroh na ki ki long kumjuh. Hynrei ka Sorkar kan hap ban khmih bha ia kane khnang ba kan nym phah ia ki nongtuh ba kin kem ia ki nongtuh” ula bynrap.
U Bah Lambok ula ban jur ruh ia ka jingdonkam ia ka Sorkar ban wanrah ia ka Cell la ka jong ban set ia ki nongdih droks kiba shah kem haba ong “Kane ka cell ka dei ban don ia ki councelling centre ki ban iarap ia ki briew bala kyrni ba kin lait noh na une u jingdih”.
