Shillong, K’Lyngkot 09: Ka Khasi Hills Autonomous District Council (KHADC) kan pynlong ia ka “Dorbar Iktiar Paidbah” ha madan Polo, Shillong ha ka 18 tarik mynta u bnai.
Lah ban kdew ba haka jingshisha ka KHADC ka mut ban pynlong ia ka Dorbar Iktiar Paidbah ha ka 14 tarik Nohprah 2024 hynrei la pynsangeh noh namar ki daw bym lah ban kiar.
Haba pynbna ia kane, u Chief Executive Member (CEM) ka KHADC Bah Pyniaid Sing Syiem u la ong ba ka jingthmu jong kane ka Dorbar Iktiar Paidbah ka long ban pynkup bur ia ki Dorbar Shnong, ki Dorbar Dong, ki Dorbar Kur, ki Seng Kynthei/Longkmie bad ki Seng Samla.
Ula ïathuh ruh ba ïa kane ka rai la shim hadien ka jingïakynduh ïa ki dkhot ka Federation of Khasi States (FKS), Synjuk Ki Rangbah Kur, Synjuk Ki Dorbar Kur, Lympung Ki Seng Longkmie/Kynthei, Synjuk Seng Samla Shnong nalor kiwei pat .
“Na ka liang ka District Council ngi khot, ngi iawer ïa 30 ngut ki nongmihkhmat na kawei ka shnong, kynthup ia ki dkhot jong ki Executive Committee jong ki Dorbar Shnong, Seng Kynthei/Longkmie bad Seng Samla ban wan ban iashim bynta ha ka Dorbar Iktiar Paidbah ka ban long ha ka 18 tarik Kyllalyngkot ha Madan Polo” ong u Bah Pyniaid.
U Bah Pyniaid u la pyntip ba u Lat ka Jylla CH Vijayashankar bad u Chief Justice ka Meghalaya High Court ha ryngkat ki nongiasaid ain ba rangbah na ka Jylla kin don lang ha kane ka Dorbar.
“Hadien 72 snem ba ngi la ïoh ïala ka Autonomous District Council, mynta pat ngi la ïoh ïa la ka jong ka aiñ kata ka Khasi Hills Autonomous District Administration of Elaka Amendment Act 2023 daka ba wanrah ka jingpynkylla haka Principal Act kata ka Elaka Administration 1971, ba ai jingithuh ia ki Seng Samla, Seng Kynthei bad Seng Longkmie” u la bynrap.
U Bah Pyniaid u la ong ruh ba katkum ka section 8 jong ka sub-section 11, la bthah ïa ka Dorbar Shnong bad ka Dorbar Dong ba ki dei ban pynrung kyrteng ïa baroh ki nongshong shnong bad ban buh jingtip ïa man la ki longïing bad baroh ki nongshong shnong, kynthup ïa ki trai ïing, ki trai jaka, ki nongshong wai, ki nongai wai, ki dukan, ki nongdie jingdie, ki karkhana, ki samla pule, ki nongtrei ha man la ki shnong.
Ula ong ba ha kane ka Dorbar, kan don ruh ka jingiakren halor ka jingpynkylla ia ka ain Khasi Hills Autonomous District Khasi Social Customs of Lineage Act 1971.
 kan pynlong ia ka “Dorbar Iktiar Paidbah” ha madan Polo, Shillong ha ka 18 tarik mynta u bnai.){kind=link}