Nongpoh, Risaw 17 : Ka Karbi Cultural Society Meghalaya Zone haka jingïatreilang bad ka All Meghalaya Karbi Association (AMKA), kala rai ban pynlong biang ïaka tamasa ki samla Karbi bala tip kum ka 31st Zonal Karbi Youth Festival ha Ri-Bhoi.
Ia kane ka tamasa la pynlong da ka jingangnud ban pynpaw pyrthei ïaka jingriewspah ka kolshor tynrai bad ka riti ka dustur jong ki paid Karbi khamtam ban wanrah ïaka jingïaieid bad ïajan hapdeng ki para samla Karbi.
Ïa katei ka tamasa la rai ban pynlong haka 23 bad 24 tarik mynta u bnai ha Auditorium Hall jong ka AMKA kaba don ha Umwang Ri-Bhoi District.
Naka liang u Bah Albinus Timung President ka KCS u la pyntip ba ha katei ka tamasa yn sdang ruh da ka jingïaid proseshon jong ki paid Karbi naduh ka por 9 baje mynstep bad yn sa pynbud pat bad ki prokram bapher bapher ryngkat ki jingpynbyrngia, ki jingïakop bad ki prokram tynrai ban pyni ruh sha ka pyrthei halor ka jingriewspah ka kolshor tynrai ka riti ka dustur jong ki paid Karbi kiba shong ba sah haka jylla.
Naka liang ka Karbi Cultural Society kala khot bad wer ruh ïaki paid Karbi baroh kiba don haka them Ri-Bhoi ba kin wan ban sakhi ïa katei ka prokram ba 2 sngi ba katei ka tamasa kan long kaba seisoh.
